یورپی یونین یمنی حوثیوں کو دہشت گرد تنظیم قرار دے، سعودی عرب

خلیج بیورو (ریاض / دبئی): گوگل پر ڈی ڈبلیو کو ترجیح دیں یورپی یونین اب تک حوثیوں کو دہشت گرد قرار دینے سے گریز کرتی رہی ہے، جبکہ امریکہ، آسٹریلیا اور کینیڈا سمیت کئی مغربی ممالک یہ اقدام کر چکے ہیں۔

تاہم یورپی یونین اب تک حوثیوں کو دہشت گرد قرار دینے سے گریز کرتی رہی ہے، جبکہ امریکہ، آسٹریلیا اور کینیڈا سمیت کئی مغربی ممالک یہ اقدام کر چکے ہیں۔

خبر رساں ادارے روئٹرز کے مطابق سعودی عرب کی یہ کوشش حوثی گروپ پر بین الاقوامی دباؤ بڑھانے کی وسیع تر مہم کا حصہ ہے۔ حوثی باغی ایک دہائی سے زائد عرصہ قبل شروع ہونے والی یمن کی خانہ جنگی کے دوبارہ بھڑکنے کے بعد حالیہ ہفتوں میں تقریباً روزانہ ہی سعودی عرب پر حملے کر رہے ہیں۔

سعودی عرب ایک عشرے سے زائد عرصے سے یمن کی بین الاقوامی طور پر تسلیم شدہ حکومت کی حمایت میں حوثیوں کے خلاف ایک فوجی اتحاد کی قیادت بھی کر رہا ہے۔ حوثیوں نے 2014 میں یمن کے دارالحکومت صنعاء سے اس حکومت کو بے دخل کر دیا تھا۔

اس معاملے سے واقف چھ یورپی حکام کے مطابق یورپی ممالک کو خدشہ ہے کہ حوثیوں کو دہشت گرد تنظیم قرار دینے سے اس گروپ کے ساتھ رابطے کے محدود ذرائع بھی ختم ہو جائیں گے اور یمن میں مستقبل کے امن عمل میں یورپی کردار بھی متاثر ہو سکتا ہے۔

حوثیوں کو دہشت گرد تنظیموں کی فہرست میں شامل کرنے کے لیے یورپی یونین کے تمام 27 رکن ممالک کی متفقہ حمایت درکار ہو گی۔ ان چھ حکام میں سے ایک نے بتایا کہ اب تک صرف چند ممالک ہی اس ممکنہ اقدام کے حامی ہیں۔ انہوں نے نجی نوعیت کی بات چیت کا حوالہ دیتے ہوئے ان ممالک کے نام بتانے سے انکار کر دیا۔

سعودی حکومت کے کمیونیکیشن دفتر نے اس بارے میں تبصرے کی ایک درخواست کا کوئی جواب نہ دیا۔ یورپی یونین کے خارجہ پالیسی کے ترجمان انوار الانونی نے کہا کہ یورپی بلاک علاقائی صورت حال سمیت مختلف امور پر ریاض کے ساتھ مسلسل رابطے میں ہے، تاہم انہوں نے مخصوص نوعیت کے باہمی مذاکرات پر تبصرہ کرنے سے گریز کیا۔

حوثیوں کے خلاف سخت موقف کی یورپ میں حمایت کا اشارہ دیتے ہوئے یورپی پارلیمنٹ نے گزشتہ ماہ ایک قرارداد منظور کی تھی، جس میں یورپی یونین سے حوثیوں کو دہشت گرد تنظیم قرار دینے کا مطالبہ کیا گیا تھا۔ تاہم یہ اقدام بڑی حد تک علامتی نوعیت کا ہے۔

لندن میں قائم دفاعی تحقیقی ادارے رائل یونائیٹڈ سروسز انسٹیٹیوٹ کی سینئر فیلو جوآنا ڈی دیوس پریرا نے کہا کہ یورپی ممالک سعودی عرب کے ساتھ یکجہتی کا اظہار کرنا چاہتے ہیں، لیکن حوثیوں کو دہشت گرد تنظیم قرار دینے کے معاملے میں تاحال ہچکچاہٹ کا شکار ہیں، کیونکہ اس اقدام کے عملی اثرات محدود ہوں گے۔

ان کے مطابق یورپی ممالک کو خدشہ ہے کہ حوثی اس فیصلے کے ردعمل میں یمن کے قریب یورپی بحری جہازوں کو نشانہ بنا سکتے ہیں۔ اس کے علاوہ دہشت گرد قرار دیے جانے سے حوثیوں کے زیر کنٹرول علاقوں میں امدادی سرگرمیاں انجام دینے والی تنظیموں کا کام بھی پیچیدہ ہو سکتا ہے۔

یورپی حکام کے مطابق ایک اور وجہ یہ ہے کہ یورپی یونین کی جانب سے کسی تنظیم کو دہشت گرد قرار دینے کا فیصلہ واپس لینا انتہائی مشکل ہوتا ہے۔ اس فیصلے کو ختم کرنے کے لیے بھی رکن ممالک کی متفقہ حمایت ضروری ہوتی ہے۔

یمن کی ساحلی پٹی بحیرہ احمر اور آبنائے باب المندب کے ساتھ واقع ہے، جو یورپ اور ایشیا کو ملانے والی ایک اہم آبی گزرگاہ ہے۔ وہاں حوثیوں کے کسی بھی حملے سے عالمی تجارت مزید متاثر ہو سکتی ہے، جو پہلے ہی ایران کے خلاف امریکہ اور اسرائیل کی شروع کردہ جنگ میں تہران کی جانب سے آبنائے ہرمز بند کیے جانے کے باعث مشکلات کا شکار ہے۔