ہنگو میں گھر کے اندر ایک ہی خاندان کے 6 افراد کا قتل

پشاور (نمائندہ خصوصی): ہنگو: گھر کے اندر فائرنگ کرکے ایک ہی خاندان کے 6 افراد کو قتل کردیا گیا ، ملزم کی شناخت مقتول نور رحمان کے بھتیجے کے طور پر ہوئی۔

تفصیلات کے مطابق خیبر پختونخوا کے ضلع ہنگو میں تھانہ دوآبہ کی حدود میں افسوسناک واقعہ پیش آیا، جہاں ایک گھر کے اندر فائرنگ کے نتیجے میں 2 خواتین اور 3 بچوں سمیت ایک ہی خاندان کے 6 افراد جاں بحق ہو گئے۔

ڈی پی او صلاح الدین کنڈی نے بتایا کہ یہ واقعہ سروخیل کے علاقے میں پیش آیا، فائرنگ سے گھر کا سربراہ نور رحمان، 2 خواتین اور 3 کمسن بچے موقع پر ہی جاں بحق ہوئے۔

ابتدائی تحقیقات کے مطابق ملزم کی شناخت مقتول نور رحمان کے بھتیجے کے طور پر ہوئی ہے، جو نشے کا عادی ہے۔

ڈی پی او کا کہنا تھا کہ مقتول نور رحمان اپنے بھتیجے کو گھر میں نشئی دوست لانے سے روکتا تھا، جس پر یہ تنازعہ پیش آیا تاہم پولیس نے تمام لاشوں کو تحویل میں لے کر دوآبہ اسپتال منتقل کر دیا ہے۔

ڈی پی او ہنگو کا کہنا ہے کہ واقعے کے تمام محرکات جاننے کے لیے ہر پہلو سے تحقیقات کی جا رہی ہیں اور فرار ملزم کی گرفتاری کے لیے چھاپے مارے جا رہے ہیں۔