اسموگ پر قابو پانے کیلئے کئی سال مسلسل محنت کرنا ہو گی: ملک احمد خان

لاہور (بیورو رپورٹ): اسپیکر پنجاب اسمبلی ملک محمد احمد خان نے کہا ہے کہ اسموگ کے مسئلے پر قابو پانے کے لیے ہمیں کئی سال مسلسل محنت کرنا ہو گی۔

لاہور میں انڈسٹریل ایکسپو کی افتتاحی تقریب کے دوران اپنے خطاب میں انہوں نے کہا ہے کہ پنجاب حکومت اسموگ پر قابو پانے کے لیے ٹھوس اقدامات کر رہی ہے۔

ملک احمد خان کا کہنا ہے کہ ملک میں ترقی کا راستہ شروع ہو گیا ہے اور یہ اب بڑھتا چلا جائے گا۔

اسپیکر پنجاب اسمبلی ملک احمد خان نے کہا ہے کہ پارلیمنٹ کی عزت پر حرف نہیں آنا چاہیے، لوگوں کو کریمنل ایکٹ پر پکڑا جانا چاہیے، لوگوں کو پکڑا گیا وجوہات کوئی بھی ہوں، جن کا کام سیاست کرنا ہے، پارلیمنٹ میں سیاست سے گھبرا رہے ہیں۔

انہوں نے کہا ہے کہ دہشت گردی کے ہوتے ہوئے معیشت آگے نہیں بڑھتی بلکہ اس کا ایک حملہ پوری معیشت کو ہلا کر رکھ دیتا ہے۔

اسپیکر پنجاب اسمبلی نے یہ بھی کہا ہے کہ آج سرمایہ کاری کرنے والے ہیرو کہلائے جانے کے مستحق ہیں۔