امریکہ اور ایران کے درمیان ثالث، قطر کے امیر کی صدر ٹرمپ سے آج ملاقات

بین الاقوامی ڈیسک (واشنگٹن / لندن): امریکی صدر ڈونلڈ ٹرمپ ایران کے ساتھ جاری جنگ کے خاتمے کے لیے سفارتی کوششوں کے سلسلے میں آج پیر کو قطر کے وزیراعظم شیخ محمد بن عبدالرحمان آل ثانی سے ملاقات کریں گے، تاہم امریکی اور خلیجی حکام نے فوری جنگ بندی معاہدے کے امکانات کو ’محدود‘ قرار دیا ہے۔

برطانوی خبر رساں ادارے ’روئٹرز‘ کے مطابق 28 فروری کو امریکہ اور اسرائیل کی جانب سے ایران کے خلاف شروع کی گئی جنگ کو آٹھ ماہ سے زائد کا عرصہ گزر چکا ہے تاہم اب تک کسی فریق کو فیصلہ کن کامیابی حاصل نہیں ہو سکی۔

امریکی صدر ڈونلڈ ٹرمپ نے مستقبل قریب میں بڑے پیمانے پر دوبارہ جنگ شروع ہونے کے امکانات کو کم قرار دیا ہے تاہم وہ ایران کی جانب سے پیش کردہ جنگ بندی منصوبے کو قبول کرنے پر آمادہ نہیں ہیں۔

دوسری جانب خطے میں کشیدگی برقرار ہے۔ ایرانی سرکاری میڈیا کے مطابق امریکہ نے رات گئے ایران کے جزیرے قشم کو نشانہ بنایا، جبکہ ایران رواں ماہ خلیج اور آبنائے ہرمز میں آئل ٹینکرز پر حملے کر چکا ہے۔ ایران کے اتحادی یمنی حوثی بھی سعودی عرب کو نشانہ بنا چکے ہیں۔

رپورٹ کے مطابق ایران کی جانب سے جنگ کے خاتمے کے لیے پیش کردہ منصوبے میں امریکی بحری ناکہ بندی ختم کرنے، بعض پابندیاں اٹھانے اور بمباری روکنے کا مطالبہ کیا گیا ہے۔ اس کے بدلے میں ایران آبنائے ہرمز کی ناکہ بندی ختم کرنے پر آمادہ ہے جبکہ ایرانی جوہری پروگرام اور دیگر پابندیوں سے متعلق مذاکرات بعد میں کرنے کی تجویز دی گئی ہے۔

امریکہ نے اب تک ایران کے اس منصوبے کو مسترد کیا ہے۔ امریکی وزیر خارجہ مارکو روبیو نے اتوار کو ایرانی شرائط کو ’ناقابل قبول، مضحکہ خیز اور غیر حقیقت پسندانہ‘ قرار دیا۔ تاہم ایرانی وزارت خارجہ کے ترجمان اسماعیل بقائی نے پیر کو اس منصوبے کا دفاع کرتے ہوئے اسے مذاکرات کی میز پر موجود سب سے معقول پیشکش قرار دیا۔

قطر کے وزیراعظم اور وزیر خارجہ شیخ محمد بن عبدالرحمان آل ثانی گزشتہ ہفتے تہران کا دورہ کر چکے ہیں۔ وہ پیر کو واشنگٹن میں امریکی صدر ڈونلڈ ٹرمپ اور نائب صدر جے ڈی وینس سے ملاقات کریں گے۔

قطر جنگ کے آغاز سے ہی امریکہ اور ایران کے درمیان رابطوں اور پیغامات کی ترسیل میں اہم ثالث کا کردار ادا کر رہا ہے اور دونوں ممالک کے اختلافات کم کرنے کے لیے تجاویز بھی پیش کرتا رہا ہے۔

ادھر متحدہ عرب امارات کے سینئر عہدیدار انور قرقاش نے بھی امریکہ اور ایران کے درمیان جامع سیاسی معاہدے کے امکانات کو مشکل قرار دیا ہے۔ ان کا کہنا تھا کہ ’خطے کو طویل عرصے تک غیر یقینی صورتحال کے لیے تیار رہنا چاہیے، کیونکہ نہ تو جنگ کے فیصلہ کن خاتمے اور نہ ہی مستحکم علاقائی نظام کی ضمانت دی جا سکتی ہے۔‘۔

واضح رہے کہ گزشتہ ہفتے ہونے والے وسط مدتی انتخابات میں ریپبلکن پارٹی کی خراب کارکردگی کے بعد امریکہ میں ایران جنگ ختم کرنے کے لیے سیاسی دباؤ بڑھا ہے۔ امریکی نائب صدر جے ڈی وینس سمیت ریپبلکن رہنماؤں نے بھی انتخابی نتائج پر ایران جنگ کے اثرات کی نشاندہی کی ہے۔

تاہم امریکی وزیر خارجہ مارکو روبیو کا کہنا ہے کہ انہیں فی الحال سفارتی محاذ پر کسی بڑی پیش رفت کی توقع نہیں ہے۔