لاہور دنیا کا آلودہ ترین بڑا شہر، کیا انڈیا سے آنے والی آلودہ ہوا اس کی وجہ ہے؟

لاہور (بیورو رپورٹ): پاکستان نے رواں ہفتے ملک کے مختلف علاقوں میں فضائی آلودگی کی شدت کا ذمہ دار پڑوسی ملک انڈیا سے آنے والی آلودہ ہوا کو قرار دیا ہے۔

حکام کے مطابق انڈیا میں ہندوؤں کے مذہبی تہوار دیوالی کے موقع پر ہفتے کے اختتام پر بڑے پیمانے پر آتش بازی کی گئی، جس کے نتیجے میں شمالی انڈیا کا بیشتر حصہ زہریلی دھند کی لپیٹ میں آ گیا۔

سوئس ادارے آئی کیو ایئر کی جانب سے جاری کردہ فہرست کے مطابق لاہور منگل کو مسلسل دوسرے روز دنیا کے آلودہ ترین بڑے شہروں میں پہلے نمبر پر رہا۔ شہر کا ایئر کوالٹی انڈیکس (اے کیو آئی) 263 ریکارڈ کیا گیا، جسے ’انتہائی غیر صحت بخش‘ قرار دیا گیا ہے۔

آئی کیو ایئر کے مطابق لاہور کی فضا میں پی ایم 2.5 (PM2.5) ذرات کی مقدار عالمی ادارۂ صحت کی سالانہ مقررہ حد سے 37.2 گنا زیادہ تھی۔ یہ انتہائی باریک آلودہ ذرات پھیپھڑوں میں گہرائی تک پہنچ سکتے ہیں اور انسانی صحت کے لیے نقصان دہ ہیں۔

خبررساں ادارے روئٹرز کے مطابق پنجاب کی وزیرِ تحفظِ ماحولیات مریم اورنگزیب نے کہا کہ دیوالی کے بعد انڈیا سے آنے والی آلودہ ہوا اور ہلکی ہواؤں کے باعث فضائی آلودگی خطے میں پھیلی۔ ان کے مطابق موسمی حالات بہتر ہونے اور ہواؤں کا رخ تبدیل ہونے کے بعد منگل کی دوپہر سے فضائی آلودگی میں بتدریج کمی متوقع ہے۔

خبر رساں ادارے روئٹرز کے مطابق انڈین وزارتِ خارجہ نے اس معاملے پر تبصرے کی درخواست کا فوری طور پر کوئی جواب نہیں دیا۔

آئی کیو ایئر کی فہرست میں منگل کو انڈیا کے دارالحکومت نئی دہلی دنیا کا دوسرا آلودہ ترین بڑا شہر رہا، جہاں ایئر کوالٹی انڈیکس 188 ریکارڈ کیا گیا۔ انڈین حکومت کے اعدادوشمار کے مطابق اس سے ایک روز قبل نئی دہلی میں پی ایم 2.5 ذرات کی مجموعی مقدار میں تقریباً 55 فیصد حصہ آتش بازی سے پیدا ہونے والی آلودگی کا تھا۔

پاکستان اور انڈیا دونوں میں سردیوں کے دوران فضائی آلودگی کی بڑی وجوہات میں گاڑیوں کا دھواں، تعمیراتی سرگرمیوں سے اڑنے والی گردوغبار اور فصلوں کی باقیات جلانے سے پیدا ہونے والا دھواں شامل ہیں۔

پاکستان نے 2024 میں بھی ملک میں زہریلی دھند کا ذمہ دار انڈین پنجاب میں فصلوں کی باقیات جلانے کو قرار دیا تھا۔ تاہم اس وقت انڈین محکمہ موسمیات کے حکام نے کہا تھا کہ ہواؤں کا رخ ظاہر کرتا ہے کہ ہوا کا بہاؤ دراصل پاکستان سے انڈیا کی جانب تھا۔

دوسری جانب انڈین وزیراعظم نریندر مودی کی جماعت بھارتیہ جنتا پارٹی (بی جے پی) نے بھی رواں ماہ نئی دہلی میں فضائی آلودگی کی شدت کا ذمہ دار انڈین پنجاب میں فصلوں کی باقیات جلانے کو قرار دیا ہے، جہاں ایک علاقائی اپوزیشن جماعت کی حکومت ہے۔

انڈین ذرائع ابلاغ کے مطابق دیوالی کے روز، اتوار کو انڈین پنجاب میں کھیتوں میں آگ لگانے کے واقعات میں سات گنا اضافہ ریکارڈ کیا گیا۔ تاہم انڈین پنجاب کی ریاستی حکومت کا کہنا ہے کہ فصلوں کی باقیات جلانے کے واقعات گزشتہ برسوں کے مقابلے میں کم ہوئے ہیں۔