کراچی میں یونیورسٹی روڈ پر تجاوزات کے خلاف آپریشن کا فیصلہ کرلیا گیا

کراچی (معاشی و سیاسی بیورو): کراچی میں یونیورسٹی روڈ پر تجاوزات کے خلاف آپریشن کا فیصلہ کرلیا گیا۔

سندھ کے سینئر وزیر شرجیل میمن کی زیر صدارت اجلاس میں یونیورسٹی روڈ، شہر کی اہم شاہراہوں اور پیپلز بس سروس کے روٹس پر تجاوزات کے خلاف کارروائی کا فیصلہ کیا گیا ہے۔

مراد علی شاہ نے کہا کہ بی آر ٹی ریڈ لائن لاٹ ٹو کے مین کوریڈور کا دوبارہ ٹینڈر کریں گے، امید ہے دو سے تین مہینے میں مکسڈ ٹریفک لین کا کام مکمل ہوگا، عوام کنٹریکٹر کو نہیں سندھ حکومت کو جانتے ہیں۔

شرجیل میمن نے کہا کہ کراچی کی اہم سڑکوں اور پیپلز بس سروس روٹس پر تجاوزات سے شہریوں اور مسافروں کو مشکلات کا سامنا ہوتا ہے، تجاوزات کے خلاف متعلقہ ادارے مشترکہ حکمت عملی کے تحت کارروائی کریں، غیر قانونی ٹرمینلز کیخلاف کارروائی کی جائے۔

اجلاس میں سہراب گوٹھ اور مختلف علاقوں میں قائم غیر قانونی بس اڈوں کو شہر سے باہر منتقل کرنے کے اقدامات کا فیصلہ بھی کیا گیا۔

اجلاس میں کمشنر کراچی، سیکریٹری ٹرانسپورٹ، کراچی پولیس چیف، ڈی آئی جی ٹریفک و دیگر شریک تھے۔