امریکی نائب صدر نے پیٹ ہیگسیتھ کے خلاف مواخذے کی کارروائی کو ’مضحکہ خیز‘ قرار دے دیا

بین الاقوامی ڈیسک (واشنگٹن / لندن): لائیو , امریکی نائب صدر نے پیٹ ہیگسیتھ کے خلاف مواخذے کی کارروائی کو ’مضحکہ خیز‘ قرار دے دیا امریکہ میں ایران کے خلاف جنگ کے معاملے پر سیاسی کشیدگی بڑھ گئی ہے۔ ریپبلکن پارٹی کے رُکن کانگریس نے ایوانِ نمائندگان میں امریکی وزیرِ دفاع کے خلاف مواخذے کی قرارداد جمع کروا دی ہے، جس پر آج ہی ووٹنگ ہو رہی ہے۔ پیٹ ہیگسیتھ نے اپنے خلاف مواخذے کی کوششوں کو ’تماشا‘ اور ’سیاسی ڈرامہ‘ قرار دیا ہے۔

اسرائیل کے صدر کی جانب سے حکومت تشکیل دینے کی ذمہ داری ملنے کے بعد گاڈی آئزنکوٹ نے سبکدوش ہونے والے وزیرِ اعظم نیتن یاہو کی اسرائیلی پارلیمنٹ میں کی گئی تقریر پر سخت تنقید کی ہے۔

نئی پارلیمنٹ کے آغاز کے موقع پر خطاب کرتے ہوئے نیتن یاہو نے ایک مرتبہ پھر ’ایرانی جوہری خطرے‘ کو اسرائیل کو درپیش اہم ترین چیلنج قرار دیا اور اراکینِ پارلیمان پر زور دیا کہ وہ دیگر سیاسی اختلافات اور ترجیحات کو ایک طرف رکھ کر قومی اتحاد کی حکومت کے قیام کی حمایت کریں۔

اس کے جواب میں آئزنکوٹ نے کہا کہ وہ ایک ایسے وزیرِ اعظم کی تقریر سنتے رہے جو ’خام خیالیوں میں مبتلا، نفرت انگیز اور شرمناک‘ تھی۔ ان کا کہنا تھا کہ نیتن یاہو اپنی مدت پوری کر چکے ہیں اور اب حکومتی منصب کو سیاسی مقاصد کے لیے استعمال کر رہے ہیں۔

آئزنکوٹ نے مزید کہا: ’آج مجھے پہلے سے بھی زیادہ یقین ہو گیا ہے کہ وہ اس عہدے کے لائق نہیں ہیں، ایک منٹ کے لیے بھی نہیں۔‘۔

ہم نے کئی نمایاں ناقدین کو پیٹ ہیگسیتھ کے خلاف بات کرتے ہوئے سنا ہے، لیکن اب انھیں نائب صدر کی جانب سے بھی عوامی سطح پر حمایت حاصل ہوئی ہے۔

امریکی نائب صدر نے جے ڈی وینس کے خلاف مواخذے کی کارروائی کو ’مضحکہ خیز‘ قرار دیا ہے۔

ایکس پر اپنی پوسٹ میں جے ڈی وینس کا کہنا تھا کہ ’مواخذہ اب ایک ایسا احمقانہ تماشا بن چکا ہے جو حقیقی پالیسی سازی کی جگہ لے رہا ہے۔‘۔

اُن کا کہنا تھا کہ یہ معاملہ ایران کے بارے میں نہیں ہے، بلکہ اصل بات یہ ہے کہ پیٹ نے پینٹاگون میں موجود بیوروکریسی (افسر شاہی) کو چیلنج کیا ہے۔ پینٹاگون نے اس دعوے پر کوئی تبصرہ نہیں کیا ہے۔

صدر ڈونلڈ ٹرمپ نے بھی ہیگسیتھ کی حمایت کی ہے۔

پس منظر کے طور پر، ہیگسیتھ نے حال ہی میں مسلح افواج میں اعلیٰ عہدیداروں کی تعداد میں 20 فیصد کمی کرنے کے منصوبے کا اعلان کیا تھا۔

امریکی وزیرِ دفاع پیٹ ہیگسیتھ کے مواخذے کی قرارداد پیش کرنے والے ریپبلکن رکنِ کانگریس تھامس میسی نے سوشل میڈیا پر کہا ہے کہ امریکی قانون کے تحت اگر کانگریس فوجی کارروائی کی منظوری نہ دے تو فوج کو 60 دن کے اندر کارروائیاں ختم کرنا ہوتی ہیں، جبکہ ایران کے خلاف جنگ کو شروع ہوئے اب 256 دن گزر چکے ہیں۔

میسی نے لکھا کہ ’ہیگسیتھ قانون توڑ رہے ہیں۔ اس میں بحث کی کوئی گنجائش نہیں۔‘۔

قانونی پس منظر: 1973 کے وار پاورز ریزولوشن کے تحت صدرِ امریکہ کو کسی فوجی کارروائی کے 48 گھنٹوں کے اندر کانگریس کو آگاہ کرنا ہوتا ہے۔ اگر کارروائی جاری رکھنا مقصود ہو تو کانگریس کو 60 دن کے اندر اتھارائزیشن فار یوز آف ملٹری فورس (AUMF) منظور کرنا ہوتی ہے، ورنہ فوجی کارروائی ختم کی جانی چاہیے۔

میسی اور ان کے حامیوں کا مؤقف ہے کہ ایران کے خلاف جنگ کے معاملے میں ان تقاضوں کی پاسداری نہیں کی گئی، جس کی بنیاد پر وہ وزیرِ دفاع پیٹ ہیگستھ کے مواخذے کا مطالبہ کر رہے ہیں۔

امریکی وزیرِ دفاع پیٹ ہیگسیتھ نے اپنے خلاف مواخذے کی کوششوں کو ’تماشا‘ اور ’سیاسی ڈرامہ‘ قرار دیتے ہوئے کہا ہے کہ یہ اقدامات دراصل تخریب کاری ہیں اور اس سے امریکہ کے مخالفین کو ’پروپیگنڈا میں کامیابی‘ ملے گی۔

معاملہ شروع کیسے ہوا؟ ریپبلکن رکنِ کانگریس تھامس میسی نے ہیگستھ کے مواخذے کی تحریک پیش کی۔ ناقدین کا کہنا ہے کہ ایران جنگ ریپبلکن پارٹی کی وسط مدتی انتخابات میں خراب کارکردگی کی بڑی وجوہات میں سے ایک رہی ہے۔

مواخذے کی کارروائی آگے بڑھ رہی ہے: میسی نے پیر کو باضابطہ طور پر مواخذے کی قرارداد پیش کرتے ہوئے مؤقف اختیار کیا کہ ہیگسیتھ نے کانگریس کی منظوری کے بغیر ایران کے خلاف جنگی کارروائی شروع کر کے قانون کی خلاف ورزی۔

ہیگسیتھ کا دفاع: وزیرِ دفاع نے میسی کو ’شکست خوردہ اور ناراض رکنِ کانگریس‘ قرار دیتے ہوئے کہا کہ وینزویلا اور ایران میں امریکی فوجی کارروائیاں درست اور قانونی تھیں۔

’یہ تمام کارروائیاں کمانڈر اِن چیف کے حکم پر کی گئیں، پھر میری جانب سے ان پر عملدرآمد کا حکم دیا گیا، کانگریس کو مطلع کیا گیا اور امریکی فوجیوں نے انھیں انجام دیا۔‘۔

ٹرمپ کی حمایت برقرار: ہیگسیتھ کی پریس کانفرنس کے چند منٹ بعد صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر ان کی حمایت کرتے ہوئے انھیں ’+++A‘ قرار دیا، جبکہ تھامس میسی کو ’مکمل ناکام شخص‘ کہا۔

جیسا کہ پہلے بتایا جا چکا ہے، امریکی ایوانِ نمائندگان آج مقامی وقت کے مطابق شام ساڑھے پانچ بجے وزیرِ دفاع پیٹ ہیگسیتھ کے مستقبل سے متعلق ایک اہم ووٹنگ کرے گا۔

خبر رساں ادارے روئٹرز نے کانگریس ذرائع کے حوالے سے رپورٹ کیا ہے کہ مواخذے کی قرارداد کی منظوری کے لیے ممکنہ طور پر مطلوبہ ووٹ موجود ہیں، حالانکہ ایوان پر ڈیموکریٹس کے تین جنوری کو کنٹرول سنبھالنے تک ریپبلکن پارٹی کی اکثریت برقرار رہے گی۔

تاہم رائٹرز کے مطابق سینیٹ میں ہیگستھ کو عہدے سے ہٹانے کے امکانات کم دکھائی دیتے ہیں، کیونکہ اس کے لیے دو تہائی اکثریت درکار ہوگی، جبکہ 100 رکنی سینیٹ میں ریپبلکن پارٹی اب بھی 53 نشستوں کی حامل ہے۔

قانون سازوں کے درمیان امریکی وزیرِ دفاع پیٹ ہیگسیتھ کے مواخذے کے امکان پر بحث جاری ہے۔

امریکی وزیرِ خارجہ مارکو روبیو نے پیر کو صحافیوں سے گفتگو میں کہا کہ ان کے خیال میں ہیگسیتھ نے ’بہت اچھا کام کیا ہے‘ اور مواخذے کی کارروائی کو ’غیر منصفانہ‘ قرار دیا۔

ایوانِ نمائندگان کے ریپبلکن سپیکر مائیک جانسن نے بھی اس موقف کی حمایت کرتے ہوئے کہا کہ مواخذہ ’امریکہ کے اتحادیوں اور مخالفین، دونوں کے لیے ایک منفی پیغام ہوگا۔‘ ان کا کہنا تھا کہ ’ہم سیاسی فائدے یا سستے حربوں کے لیے کابینہ کے وزرا کا مواخذہ نہیں کرتے۔‘۔

تاہم ایوانِ نمائندگان میں ڈیموکریٹ رہنما حکیم جیفریز نے کہا کہ وہ ہیگسیتھ کے مواخذے کے حق میں ہیں۔

اے بی سی کے پروگرام This Week میں گفتگو کرتے ہوئے انھوں نے الزام لگایا کہ وزیرِ دفاع نے ’اختیارات کا غلط استعمال کیا، قومی سلامتی کو نقصان پہنچایا اور ایران کے خلاف ایک مہنگی اور غیر ضروری جنگ کا راستہ ہموار کیا۔‘۔

ڈیموکریٹ سینیٹر کرس کونز نے بھی ایران جنگ میں ہیگسیتھ کے کردار کو تنقید کا نشانہ بناتے ہوئے کہا: ’اگر صدر انھیں عہدے سے نہیں ہٹاتے تو کانگریس یہ کام کرے گی۔‘۔

امریکہ میں مواخذہ ایک غیر معمولی آئینی عمل ہے جو وفاقی حکام کے اختیارات پر آخری نگرانی کے طور پر استعمال ہوتا ہے۔ اس کے تحت کانگریس کسی اعلیٰ عہدیدار پر قانون شکنی یا سنگین بدعنوانی کا باضابطہ الزام عائد کر کے اس کے خلاف کارروائی شروع کر سکتی ہے۔

پہلا مرحلہ: ایوانِ نمائندگان (House of Representatives)۔

کوئی رکن مواخذے کی قرارداد یا الزامات (Articles of Impeachment) پیش کرتا ہے۔ موجودہ معاملے میں یہ اقدام ریپبلکن رکن کانگریس تھامس میسی نے کیا۔

اگر ایوانِ نمائندگان میں سادہ اکثریت مواخذے کے حق میں ووٹ دے دے تو قرارداد منظور ہو جاتی ہے۔

اس مرحلے پر عہدیدار کا مواخذہ ہو جاتا ہے، لیکن وہ فوری طور پر اپنے عہدے سے نہیں ہٹتا۔

اس کے بعد معاملہ سینیٹ میں جاتا ہے جہاں باقاعدہ ٹرائل ہوتا ہے۔

سینیٹرز شواہد کا جائزہ لیتے اور مقدمے کی سماعت کرتے ہیں۔

عہدیدار کو عہدے سے ہٹانے کے لیے سینیٹ کے دو تہائی ارکان کی حمایت درکار ہوتی ہے۔

اگر دو تہائی اکثریت مواخذے کے حق میں نہ ہو تو عہدیدار اپنے منصب پر برقرار رہتا ہے۔

مختصراً، مواخذہ الزام عائد کرنے کا عمل ہے، جبکہ عہدے سے ہٹانے کا فیصلہ سینیٹ کے ٹرائل کے بعد ہوتا ہے۔

کانگریس کے رکن تھامس میسی نے کہا ہے کہ امریکی ایوانِ نمائندگان آج وزیرِ دفاع پیٹ ہیگسیتھ کے خلاف مواخذے کی قرارداد پر ووٹنگ کرے گا۔

انھوں نے بتایا کہ پہلی ووٹنگ ایک طریقۂ کار سے متعلق اس تجویز پر ہو گی جس کا مقصد مواخذے کی قرارداد کو مسترد کرنا ہے۔

میسی نے مزید کہا: ’اگر ہم اس کوشش کو ناکام بنانے میں کامیاب ہو گئے تو پھر مواخذے کی دفعات پر باقاعدہ بحث اور ووٹنگ ہوگی۔‘۔

انھوں نے سوشل میڈیا پلیٹ فارم ایکس پر شیڈول بھی شیئر کیا، جس کے مطابق ایوانِ نمائندگان کا اجلاس صبح 10 بجے مشرقی امریکی وقت (15:00 جی ایم ٹی) شروع ہوگا، جبکہ پہلی اور آخری ووٹنگ بالترتیب شام 5:30 بجے مشرقی امریکی وقت (22:30 جی ایم ٹی) تک متوقع ہیں۔

امریکہ میں ایران کے خلاف جنگ کے معاملے پر سیاسی کشیدگی بڑھ گئی ہے۔ امریکی وزیرِ دفاع پیٹ ہیگسیتھ کو ان کی اپنی جماعت کے رکن تھامس میسی کی جانب سے مواخذے (امپیچمنٹ) کی کوشش کا سامنا ہے۔

میسی کا مؤقف ہے کہ ایران کے خلاف جنگ شروع کرنے اور جاری رکھنے کے لیے کانگریس کی منظوری نہیں لی گئی، جس سے آئینی حدود کی خلاف ورزی ہوئی۔ انھوں نے ہیگسیتھ کے خلاف آٹھ نکات پر مشتمل مواخذے کی قرارداد پیش کی ہے، جس میں ایران پر جنگ، یمن میں حملے، شہری ہلاکتوں کی روک تھام سے متعلق قوانین کی خلاف ورزی اور دیگر الزامات شامل ہیں۔

دوسری جانب ہیگسیتھ نے پینٹاگون میں چھ ماہ بعد اپنی پہلی پریس کانفرنس میں ان الزامات کو سختی سے مسترد کیا۔ انھوں نے مواخذے کی کوشش کو ’تماشا‘، ’مذاق‘ اور ’تخریب کاری‘ قرار دیتے ہوئے کہا کہ امریکہ کی تمام فوجی کارروائیاں قانونی تھیں اور صدر ڈونلڈ ٹرمپ کے احکامات کے تحت کی گئیں۔

ان کا کہنا تھا کہ ایران کے خلاف کارروائی امریکہ کے تحفظ کے لیے ضروری تھی اور اس سے ایرانی فوجی صلاحیت کو شدید نقصان پہنچا ہے۔

صدر ٹرمپ بھی کھل کر اپنے وزیرِ دفاع کے ساتھ کھڑے نظر آئے۔ انھوں نے ہیگسیتھ کی کارکردگی کو ’اے پلس‘ قرار دیا اور تھامس میسی کو ’ناکام‘ سیاست دان کہا۔ امریکی وزیرِ خارجہ مارکو روبیو نے بھی ہیگسیتھ کا دفاع کرتے ہوئے کہا کہ صدر بطور کمانڈر اِن چیف ایسے فیصلے کرنے کا اختیار رکھتے ہیں اور ایران طویل عرصے سے امریکہ کے لیے خطرہ رہا ہے۔

تاہم ایران کے خلاف جنگ امریکی سیاست میں متنازع موضوع بن چکی ہے۔ حالیہ مڈٹرم انتخابات میں ریپبلکن جماعت کو نقصان پہنچنے کی ایک بڑی وجہ ایران جنگ اور اس کے معاشی اثرات کو قرار دیا جا رہا ہے۔ ایک سروے میں تقریباً 63 فیصد امریکیوں نے کہا کہ ایران کے خلاف فوجی کارروائی کا فیصلہ غلط تھا۔

اگرچہ ریپبلکن جنوری تک کانگریس میں اکثریت رکھتے ہیں اور موجودہ مواخذے کی کوشش کے کامیاب ہونے کے امکانات کم ہیں، لیکن یہ معاملہ ٹرمپ انتظامیہ اور ہیگسیتھ کے لیے سیاسی دباؤ بڑھا رہا ہے۔

ادھر ٹرمپ نے ایک بار پھر دعویٰ کیا ہے کہ ایران عسکری طور پر ’عملاً ختم‘ ہو چکا ہے اور جنگ جلد ختم ہو سکتی ہے، جبکہ ہیگسیتھ نے بھی ایران کے خلاف کارروائی کو ’تاریخی فوجی کامیابی‘ قرار دیا ہے۔ تاہم اس جنگ کے قانونی جواز، سیاسی اثرات اور انسانی قیمت پر امریکہ میں بحث بدستور جاری ہے۔

ایران کی پاسدارانِ انقلاب نے دعویٰ کیا ہے کہ آبنائے ہرمز کے غیر مجاز راستے سے گزرنے کی کوشش کرنے والے دو آئل ٹینکروں ٘میں آگ لگ گئی۔

پاسدارانِ انقلاب کی بحریہ کے شعبۂ تعلقاتِ عامہ کی جانب سے جاری بیان میں کہا گیا ہے کہ ان میں سے ایک ’سپر ٹینکر‘ تھا جو ایک بارودی سرنگ سے ٹکرا گیا تھا۔

بیان کے مطابق دوسرا ٹینکر، جس نے امریکی طیاروں کی مدد سے خفیہ طور پر غیر قانونی راستے سے گزرنے کی کوشش کی، کو حادثہ پیش اور اس میں آگ لگ گئی جس کے بعد وہ اپنا سفر جاری نہ رکھ سکا۔

پاسدارانِ انقلاب کا کہنا ہے کہ دونوں جہازوں نے اپنے رہنمائی اور ٹریکنگ کے نظام بند کر رکھے تھے۔

ایران کا اصرار ہے کہ جہازوں کو آبنائے ہرمز سے اسی راستے کے ذریعے گزرنا چاہیے جو اس نے مقرر کیا ہے، جبکہ دیگر راستوں سے گزرنے والے جہازوں کو وہ ’خلاف ورزی کرنے والا‘ قرار دیتا ہے۔

پاکستان کے صوبہ بلوچستان میں ہائیکورٹ نے پشتنونخوا ملی عوامی پارٹی کے رہنما اور سابق رکن بلوچستان اسمبلی مجید اچکزئی کی ٹریفک پولیس اہلکار کی ہلاکت کے مقدمے میں بریت کے خلاف اپیل کو منظور کرتے ہوئے انھیں دس سال قید کی سزا سنائی ہے۔

مجید اچکزئی کی گاڑی کی ٹکر سے کوئٹہ شہر میں ٹریفک پولیس کے سب انسپکٹر عطااللہ کی ہلاکت کا واقعہ جون 2017 کو جی پی او چوک پر پیش آیا تھا۔ اس بارے میں مزید یہاں پڑھیے >>۔

ہلاک ہونے والے ٹریفک پولیس انسپکٹر ایک طرف کی ٹریفک کو گزارنے کے لیے شاہراہ کے درمیان کھڑے تھے کہ زرغون روڈ پر اسمبلی کی جانب سے آتی ہوئی مجید اچکزئی کی گاڑی نے انھیں کچل دیا تھا۔

ان کی ہلاکت کے مقدمے میں مجید اچکزئی کو گرفتار کیا گیا تھا تاہم بعد میں وہ ضمانت پر رہا ہو گئے تھے۔

ان کی بریت کے خلاف استغاثہ کی جانب سے بلوچستان ہائیکورٹ میں اپیل دائر کی گئی تھی۔

ہائیکورٹ کے جسٹس عامر رانا اور جسٹس عبدالقیوم لہڑی پر مشتمل بینچ نے اس اپیل پر فیصلہ سناتے ہوئے اسے منظور کرلیا ہے۔

ہائیکورٹ نے ماتحت عدالت کے فیصلے کو کالعدم قرار دیتے ہوئے مجید خان اچکزئی کو تعزیرات پاکستان کے دفعہ 320 کے تحت دس سال قید بامشقت سزا سنائی ہے۔

عدالت نے مجید خان اچکزئی کو مقتول کے قانونی ورثا کو دیت کی رقم بھی ادا کرنے کا حکم دیا ہے۔

ہائیکورٹ نے مجید خان اچکزئی کی ضمانت کو منسوخ کرتے ہوئے ان کو گرفتار کرنے اور سزا کاٹنے کے لیے جیل منتقل کرنے کا حکم بھی صادر کیا ہے۔

کینیڈا نے ایک بار پھر ایران کے توانائی اور بینکاری کے شعبوں سے وابستہ 11 ایرانی کمپنیوں پر پابندیاں عائد کر دی ہیں۔

ان کمپنیوں پر سے 2016 میں جوہری معاہدے (جے سی پی او اے) کے تحت پابندیوں اٹھائی گئی تھیں۔

کینیڈا کی وزارتِ خارجہ کی جانب سے جاری بیان میں کہا گیا ہے کہ ان پابندیوں کو دوبارہ نافذ کرنے کا مقصد ان ’ایرانی مالیاتی نیٹ ورکس‘ میں خلل ڈالنا ہے جنھیں ’جوہری پروگرام کی معاونت‘ کے لیے استعمال کیا جا رہا ہے۔

محکمۂ خارجہ کا کہنا ہے کہ جے سی پی او اے جوہری معاہدے پر دستخط کے بعد ہونے والی پیش رفت کے پیشِ نظر یہ پابندیاں اٹھا لی گئی تھیں، تاہم اس کے بعد سے ’بین الاقوامی جوہری توانائی ایجنسی (آئی اے ای اے) کے ساتھ تعاون میں ایران کی بار بار ناکامیوں نے اس کے جوہری پروگرام کے بارے میں خدشات کو جنم دیا ہے۔‘۔

کینیڈا کی وزیرِ خارجہ انیتا آنند نے کہا کہ 2015 کے جے سی پی او اے معاہدے کے عملی طور پر ختم ہو جانے کے بعد بھی کینیڈا اپنے شراکت داروں کے ساتھ مل کر ایران کے ساتھ ایک پائیدار جوہری معاہدے تک پہنچنے میں دلچسپی رکھتا ہے۔

انھوں نے زور دے کر کہا کہ ’کینیڈا کا مؤقف واضح ہے: ایران کو جوہری ہتھیار حاصل کرنے کی اجازت نہیں دی جانی چاہیے۔‘۔

ایران ہمیشہ یہ مؤقف اختیار کرتا رہا ہے کہ اس کا جوہری پروگرام صرف پُرامن مقاصد کے لیے ہے۔

یوکرین، روس اور امریکہ کے درمیان یوکرین جنگ کے خاتمے کے حوالے سے سہ فریقی مذاکرات ابوظہبی میں شروع ہو گئے ہیں۔

اگرچہ روس کی یوکرین کے خلاف مکمل جنگ کے خاتمے کے حوالے سے کسی بڑی پیش رفت کی توقعات کم ہیں، تاہم امریکی حکام نے گذشتہ روز کہا تھا کہ جنگ کے بعد کے ممکنہ منظرنامے میں یوکرین کے مشرقی علاقوں کے کنٹرول کے معاملے پر ماسکو اور کیئیو نے ’کچھ لچک‘ کا مظاہرہ کر رہے ہیں۔

امریکی صدر ڈونلڈ ٹرمپ کے داماد جیرڈ کشنر، جو امن کے لیے امریکی نمائندے سٹیو وٹکوف کے ساتھ امریکی وفد کا حصہ ہیں، نے کہا ہے کہ مذاکرات کا محور روس اور یوکرین دونوں کے ’جنگ کے بعد کے سکیورٹی خدشات‘ ہوں گے۔

انھوں نے ایکس پر لکھا کہ ’اس عمل کا ایک اہم حصہ تمام فریقوں کی حوصلہ افزائی کرنا ہے کہ وہ جنگ کے بعد کی صورتحال کے بارے میں سنجیدگی سے سوچنا شروع کریں۔‘۔

اجلاس سے قبل دونوں امریکی نمائندوں نے ابوظہبی میں یوکرینی، یورپی اور نیٹو حکام سے ملاقات کی، جبکہ فرانس کے وزیر خارجہ ژاں نوئل بارو نے زور دے کر کہا کہ فرانس، برطانیہ اور جرمنی ’یقینی طور پر مذاکراتی کمرے میں موجود ہوں گے۔‘۔

یورپی حکام کو خدشہ ہے کہ روس مستقبل کے ’اجتماعی سکیورٹی‘ انتظامات پر ان کی شمولیت کے بغیر امریکہ کے ساتھ کوئی معاہدہ طے کرنے کی کوشش کر سکتا ہے، جبکہ تنازع کے خاتمے کے حوالے سے ماسکو اور کیئیو کے مؤقف اب بھی ایک دوسرے سے خاصے مختلف ہیں۔

دونوں فریقوں کے درمیان اختلاف کا ایک اہم نکتہ یوکرین کا مشرقی علاقہ دونیتسک ہے، جس کا بیشتر حصہ اس وقت روس کے قبضے میں ہے۔

ماسکو کا مطالبہ ہے کہ یوکرین دونیتسک کے باقی ماندہ زیرِکنٹرول علاقوں سے بھی دستبردار ہو جائے، جبکہ کیئیو کنٹرول لائن کو موجودہ حالت میں منجمد کرنا چاہتا ہے تاکہ وہ اپنے زیرِکنٹرول علاقوں پر قبضہ برقرار رکھ سکے، جنھیں وہ اپنی مستقبل کی سلامتی کے لیے اہم قرار دیتا ہے۔

اگرچہ دونوں فریق ابھی تک اپنے ان مطالبات سے پیچھے نہیں ہٹے، لیکن مذاکرات سے ایک روز قبل ایک امریکی عہدیدار نے اشارہ دیا کہ یہ صرف عوامی مؤقف ہے اور ماسکو اور کییف نجی سطح پر ’کچھ لچک‘ دکھا چکے ہیں۔

پاکستان سٹاک ایکسچینج میں آج تیزی کا رجحان دیکھا گیا۔ مارکیٹ انڈیکس 5448 پوائنٹس کے اضافے کے بعد پاکستان سٹاک مارکیٹ کا 100 انڈیکس 179335 پوائنٹس سطح پر بند ہوا۔

اج مارکیٹ میں کاروبار کے آغاز سے حصص کی خریداری کا رجحان دیکھا گیا۔

مارکیٹ تجزیہ کاروں کے مطابق مارکیٹ میں تیزی کی وجہ مشرق وسطی میں جنگ کے خاتمے کے امکانات ہیں جو امریکہ میں انتخابات میں ڈیموکریٹکس کے جیتنے کے بعد بڑھ گئے ہیں۔

انھوں کے کہا کہ مارکیٹ میں حصص کی قیمتیں کافی نیچے ہیں جو اس سال 28 فروری میں امریکہ-ایران جنگ کی وجہ سے کم ہوئی تھیں۔

جبران سرفراز کے مطابق اب جنگ کے خاتمے کے امکانات بڑھے ہیں تو سرمایہ کاروں کی جانب سے ان کی خریداری کا رحجان بڑھا ہے جس سے انڈیکس میں اضافہ ہوا ہے۔

سپین کے شمالی شہر اووییدو میں ایک مشکوک بیگ پھٹنے کے نتیجے میں ایک پولیس اہلکار ہلاک جبکہ ایک اور زخمی ہو گیا ہے۔

پولیس کے مطابق یہ دھماکہ منگل کی صبح اُس وقت ہوا جب سپین کے خصوصی کینائن یونٹ (کتوں کی مدد سے بم تلاش کرنے والے دستے) کے اہلکار ایک مشتبہ بیگ کا معائنہ کرنے کے لیے موقع پر پہنچے تھے۔

سپین کی پولیس نے سوشل میڈیا پلیٹ فارم ایکس پر جاری ایک بیان میں ہلاک ہونے والے اہلکار، خوان خوسے، کو خراجِ عقیدت پیش کرتے ہوئے کہا ہماری ہمدردیاں ان کے اہلِ خانہ، دوستوں، ساتھیوں اور تمام عزیزوں کے ساتھ ہیں۔

مقامی میڈیا کے مطابق پولیس اہلکار ایک الگ واقعے کی تحقیقات کے سلسلے میں موقع پر موجود تھے، جہاں انھیں یہ مشتبہ بیگ ملا تھا۔

سعودی قیادت میں قائم فوجی اتحاد نے دعویٰ کیا ہے کہ اس نے سعودی عرب کے مشرقی علاقے میں ایک ڈرون کو روک کر تباہ کر دیا ہے۔

سعودی عرب کے تیل اور گیس کے ذخائر کا بڑا حصہ اسی خطے میں واقع ہے، جبکہ تیل کی کمپنی آرامکو کا مرکزی دفتر بھی یہیں موجود ہے۔

سعودی فوجی اتحاد کی جانب سے ڈرون مار گرانے کا دعویٰ ایک ایسے وقت میں سامنے آیا ہے جب اتحاد کے ترجمان ترکی المالکی نے چند گھنٹے قبل حوثیوں کی جانب سے داغے گئے دو بیلسٹک میزائل مار گانے کے دعوے کیے تھے۔

سوشل میڈیا پلیٹ فارم ایکس پر جاری ایک بیان میں ترکی المالکی نے کہا کہ فضائی دفاعی نظام نے ریاض کی جانب داغے گئے ایک بیلسٹک میزائل کو فضا ہی میں تباہ کر دیا۔ اس سے قبل انھوں نے جنوبی سعودی عرب کی جانب داغے گئے ایک اور مزیائل کو مار گرانے کا بھی دعویٰ کیا تھا۔

سعودی اتحاد نے الزام عائد کیا کہ یہ دونوں میزائل حوثیوں کی جانب سے داغے گئے تھے۔

اسلام آباد ہائیکورٹ نے سابق وزیر اعظم عمران خان کے وکیل سلمان صفدر اور ان کی اہلیہ بشری بی بی کے وکیل سردار لطیف کھوسہ کو راولپنڈی کی اڈیالہ جیل میں اپنے موکلوں سے ملنے کی اجازت دے دی ہے۔

عدالت نے جیل کے حکام کو ہدایت دی ہے کہ کل (بدھکے روز) ان وکلا کی سابق وزیر اعظم اور ان کی اہلیہ بشری بی بی سے ایک گھنٹے تک ملاقات کروائی جائے۔

اسلام آباد ہائیکورٹ کے چیف جسٹس سرفراز ڈوگر کی سربراہی میں دو رکنی بینچ نے یہ حکم مجرمان کی طرف سے ایک سو نوے ملین پاؤنڈ کے مقدمے (القادر ٹرسٹ کیس) میں سزا کے خلاف اپیلوں کی سماعت کے دوران دی۔

سماعت کے دوران عدالت نے سابق وزیر اعظم کے وکیل سلمان صفدر کو مخاطب کرتے ہوئے کہا کہ وہ ملاقات کا یہ حکم قانون کے مطابق دے رہے ہیں اور یہ نہ ہو کہ آپ آکر عدالت سے استدعا کریں کہ پانچ مزید افراد کو عمران خان سے ملاقات کے لیے اڈیالہ جیل جانے والے افراد میں شامل کیا جائے۔

بینچ کے سربراہ نے سلمان صفدر کو مخاطب کرتے ہوئے کہا کہ چند روز قبل ان کی عمران خان اور بشری بی بی سے ملاقات ہوئی تھی اور اب آپ دوبارہ ان سے کیوں ملاقات کرنا چاہ رہے ہیں۔ اس پر سلمان صفدر نے عدالت کو بتایا کہ ان کی ملاقات تو ضرور ہوئی لیکن وقت ناکافی تھا اس لیے ان کی اپنے موکل سے دوبارہ ملاقات ضروری ہے۔

عدالت نے پہلے سردار لطیف کھوسہ کی بشری بی بی اور عمران خان سے ملاقات کی اجازت دی اور پھر سلمان صفدر کو بھی اپنے موکل سے ملاقات کرنے کی اجازت دے دی۔

اسلام آباد ہائیکورٹ کا کہنا تھا کہ یہ ملاقات اڈیالہ جیل میں ایک گھنٹے کے لیے ہوگی۔

اس سے قبل اپیلوں کی سماعت کے دوران سلمان صفدر کا کہنا تھا کہ بشری بی بی سے جب ان کی ملاقات ہوئی تو انھوں نے بتایا کہ چھ ماہ پہلے حکام انھیں سرجری کروانے لے گئے اور اب 15 نومبر دوبارہ میرا آپریشن کرنے جا رہے ہیں۔

انھوں نے کہا کہ بشری بی بی کی صحت سے متعلق میڈیکل بورڈ بننا چاہیے۔ ان کا کہنا تھا کہ سپریم کورٹ میں جیل حکام نے تسلیم بھی کیا کہ بشری بی بی کی انکھوں کا مسئلہ ہے۔

سلمان صفدر نے کہا کہ صحت کی بنیاد پر انھوں نے ابھی تک ضمانت کی درخواست دائر نہیں کی اور عدالتیں خواتین کے معاملے کو ہمیشہ سے نرمی سےدیکھتی ہیں۔

انھوں نے کہا کہ بشری بی بی کا جیل میں علاج ممکن نہیں۔ ان مزید کہنا تھا کہ بشری بی بی کا علاج ہو جائے تو ان اپیلوں پر بھی دلائل دے دیں گے۔

اسلام آباد کے ایڈووکیٹ جنرل نوید ملک نے عدالت کو بتایا کہ بشری بی بی کا جیل میں علاج ہو رہا ہے۔

انھوں نے کہا کہ علاج ہر کسی کا بنیادی حق ہے اور حکومت اپنی ذمہ داری سے غافل نہیں ہے۔

ایڈووکیٹ جنرل نے بشری بی بی کو کب کب علاج کی سہولتیں فراہم کی گئیں اس متعلق تفصیلات عدالت میں جمع کروائیں۔

عمران خان کے وکیل نے عدالت سے استدعا کی کہ جیل حکام سے اس کی تفصیلات طلب کی جائیں۔

انھوں نے کہا کہ ایک خاتون کی سرجری ہوتی ہے اور اسی روز انھیں واپس سیل میں بند کر دیا جاتا ہے۔ انھوں نے کہا کہ ڈاکٹرز نے ایمرجنسی میں سرجری کی اور اسے دوبارہ جیل میں فوری بند کرنا بالکل بھی ٹھیک نہیں۔

سلمان صفدر کا کہنا تھا کہ بشری بی بی ٹھیک ہو جاتی ہیں تو میں اپیل پر دلائل شروع کر دیتا ہوں۔

نوید ملک نے عدالت کو بتایا کہ میڈیکل بورڈ آٹھ نومبر کو بھی بشری بی بی کا چیک اپ کرنے گیا تھا۔

انڈیا کے زیرانتظام کشمیر کے مشرقی خطہ لداخ میں ایک بار پھر نئی دلّی کے خلاف ناراضی کی لہر پھیل گئی ہے۔ کارگل ڈیموکریٹک الائنس اور لداخ کی سماجی، تجارتی اور رضاکار انجمنوں کی کال پر منگل کے روز ضلع کارگل میں مکمل ہڑتال کی گئی جس سے کارگل میں عام زندگی مفلوج ہوکر رہ گئی۔

یہ ہڑتال انڈین حکومت کے اُس فیصلے کے خلاف ہورہی ہے، جس کے تحت فیصلہ کیا گیا ہے کہ لداخ کے انتظامی ادارے لداخ ہِل ڈیولپمنٹ کونسل (ایل اے ایچ ڈی سی) کے انتخابات شدید ترین سردی کے دوران دسمبر میں منعقد کروائے جائیں گے۔

احتجاج کے باعث علاقے میں تمام بازار بند رہے، بار ایسوسی ایشن کی جانب سے عدالتی سرگرمیاں معطل کر دی گئیں، اور عوامی چوکوں پر خاموشی چھائی رہی۔

گذشتہ روز شام کے وقت ’جمہوریت بچاؤ‘ کے نعرے کے تحت ایک علامتی کینڈل مارچ بھی نکالا گیا۔

لداخ کے تمام مقامی دھڑوں کو متحد کرنے والا بنیادی مطالبہ بالکل سادہ ہے: ایل اے ایچ ڈی سی کے انتخابات کو ملتوی کر کے اپریل یا مئی 2027 کے گرم مہینوں میں کروائے جائیں۔

کارگل ڈیموکریٹک الائنس کے سربراہ سجاد کارگلی کا کہنا ہے کہ ’مقامی نمائندوں کے لیے سب سے بڑی تشویش جغرافیائی اور موسمی حالات کے باعث ووٹنگ کے حق سے محرومی ہے۔

’لداخ کی منفی درجہ حرارت والی سردیاں نہ صرف انتظامی اور لاجسٹک رکاوٹیں کھڑی کرتی ہیں، بلکہ جمہوری عمل کے لیے سب سے بڑا خطرہ یہاں کی آبادی کی موسمی ہجرت ہے۔‘۔

یاد رہے کہ سردیاں شروع ہوتے ہی کرگل کے ووٹرز کا ایک بڑا حصہ انڈیا کے دیگر گرم علاقوں کا رُخ کر لیتا ہے۔

لداخ سے رکن پارلیمنٹ حاجی حنیفہ جان نے اس صورتحال پر سخت تشویش کا اظہار کرتے ہوئے واضح کیا کہ خطے کی تقریباً 20 سے 25 فیصد آبادی شدید سردی کے موسم میں یہاں سے چلی جاتی ہے۔

لداخ کے لیفٹیننٹ گورنر انتظامیہ کو لکھے گئے خط میں انھوں نے دسمبر میں انتخابات کروانے کی منطق پر سوال اٹھایا اور زور دیا کہ سردیوں میں ووٹنگ کرانے سے ہزاروں ووٹرز اپنے بنیادی حقِ رائے دہی سے محروم ہو جائیں گے۔

مقامی سٹیک ہولڈرز کا ماننا ہے کہ حلقہ بندیوں کو جلد بازی میں مکمل کر کے سردیوں میں انتخابات کروانے کا انتظامیہ کا فیصلہ عوامی خواہشات کے برعکس ہے۔ کارگل کے لوگوں کے لیے ہل کونسل ہی براہِ راست مقامی گورننس کا آخری سہارا ہے۔

سجاد کارگلی نے میڈیا سے بات کرتے ہوئے انتظامیہ کے اس فیصلے کی سخت مذمت کی اور کہا کہ یکطرفہ فیصلے مسلط کرنے کا سلسلہ اب بند ہونا چاہیے۔

انھوں نے خبردار کیا کہ دسمبر کا شیڈول عوامی شمولیت کو بری طرح متاثر کرے گا اور شہریوں کے جمہوری حقوق کو پامال کرے گا۔

تجارتی انجمنوں اور ٹرانسپورٹرز نے بھی سردیوں میں ووٹنگ کے لاجسٹک مسائل پر تشویش کا اظہار کیا۔

منفی درجہ حرارت، برفانی سڑکیں اور برف باری کے باعث راستوں کی بندش سے دور دراز وادیوں میں رہنے والے بزرگوں اور عام ووٹرز کے لیے پولنگ مراکز تک پہنچنا انتہائی خطرناک ہو جائے گا۔

اس دوران لداخ سے باہر تعلیم حاصل کرنے والے سینکڑوں نوجوان سردیوں میں سڑکوں کی بندش اور ہوائی سفر کے مہنگے کرایوں کی وجہ سے واپس آنے سے قاصر ہیں، جس کی وجہ سے وہ اس سیاسی عمل کا حصہ نہیں بن سکیں گے۔

کارگل میں ہونے والی یہ ہڑتال لداخ میں بڑھتے ہوئے سیاسی تناؤ کی عکاسی کرتی ہے۔ اس سے قبل پڑوسی ضلع لیہہ میں لداخ بُدھسٹ ایسوسی ایشن جیسی تنظیموں نے بھی نئی حلقہ بندیوں اور جمہوری حقوق کی پامالی کے خلاف انتخابی بائیکاٹ کا اعلان کیا تھا۔

کارگل کے ایک سماجی کارکن حاجی مقبول حسین نے بتایا کہ ’کارگل کو مکمل طور پر بند کر کے یہاں کے لوگوں نے نئی دلّی کو ایک واضح اور متحد پیغام دیا ہے کہ اگر آبادی کا ایک چوتھائی حصہ سردی کی وجہ سے ووٹ ڈالنے سے محروم رہ جائے تو جمہوریت کبھی موثر نہیں ہو سکتی۔‘۔

’عوام کا مطالبہ ہے کہ انتظامیہ ہمالیہ کے منفرد جغرافیائی حالات کا احترام کرے اور ایل اے ایچ ڈی سی انتخابات کو موسمِ گرما یا بہار تک مؤخر کرے تاکہ ہر لداخی کو اپنا ووٹ ڈالنے کا برابر موقع مل سکے گا۔

پاکستان کی وفاقی آئینی عدالت کے حکم کے بعد پشاور ہائی کوٹ کی جانب سے خیبر پختونخوا میں گورنر راج اور ایمر جنسی کے نفاذ کے خلاف دائر درخواستوں کو کاز لسٹ سے نکالے جانے کے خلاف صوبے کی بار کونسل کی اپیل پر آج (منگل) کے روز وکلا نے احتجاجاً صوبے میں عدالتوں میں پیش نہ ہونے کا اعلان کیا ہے۔

یاد رہے کہ خیبر پختونخوا بار کونسل نے صوبے میں گورنر راج اور ایمر جنسی کے نفاذ کو غیر جمہوری عمل قرار دیا ہے۔

خیبر پختونخوا بار کونسل نے سات نومبر 2026 کو اپنے جنرل باڈی کے ہنگامی اجلاس میں وفاقی آئینی عدالت کے اس فیصلے پر شدید تحفظات کا اظہار کیا جس کے تحت پشاور ہائی کورٹ کے آئین کے آرٹیکل 199 کے تحت تفویض کردہ اختیارات محدود کیے گئے ہیں۔

بار کونسل نے وفاقی آئینی عدالت کے فیصلے کو صوبے کے عوام کے بنیادی حقوق اور انصاف تک رسائی کے لیے نقصان دہ قرار دیتے ہوئے فیصلہ کیا گیا کہ بار کونسل اس مقدمے میں فریق بننے کے لیے وفاقی آئینی عدالت سے رجوع کرے گی اور وکلا کا خصوصی پینل تشکیل دیا جائے گا۔

وفاقی آئینی عدالت کے پانچ نومبر 2026 کے حکم کے بعد پشاور ہائی کورٹ میں 12 اکتوبر یا اس کے بعد دائر ہونے والی آئینی درخواستوں کی کارروائی معطل ہونے کا معاملہ سامنے آیا ہے۔ آئینی عدالت کے حکم کے بعد پشاور ہائی کورٹ کی انتظامی کمیٹی نے بھی ایسی نئی درخواستوں کو سماعت کے لیے مقرر نہ کرنے کی ہدایت جاری۔

اس فیصلے کی بنیاد آئین پاکستان کا آرٹیکل 245 ہے، جو مسلح افواج کو وفاقی حکومت کی ہدایت پر سول انتظامیہ کی معاونت کا اختیار دیتا ہے۔

اسی آرٹیکل کی شق (3)245 اور (4)245 کے تحت مخصوص حالات میں اُن علاقوں میں ہائی کورٹ کے آئینی اختیار اور متعلقہ کارروائیوں پر پابندی عائد ہو سکتی ہے جہاں فوج سول انتظامیہ کی معاونت کر رہی ہو۔

11 اکتوبر کو وفاقی حکومت نے خیبر پختونخوا میں گورنر راج اور ایمر جنسی نافذ کرنے کا اعلان کیا تھا جس کے بعد پاکستان تحریک انصاف کے قائدین کے علاوہ دیگر وکلا نے بھی اس اقدام کو پشاور ہائی کورٹ میں چیلنج کرتے ہوئے درخواستیں جمع کروائی تھیں جن کی سماعت 10 نومبر کو ہونی تھیں۔

تاہم گذشتہ ہفتے وفاقی آئینی عدالت نے پشاور ہائی کورٹ میں ان درخواستوں کی سماعت معطل کرنے کا حکم دیا تھا جس کے بعد اس طرح کی درخواستیں پشاور ہائی کورٹ کی کاز لسٹ سے ہٹا دی گئی تھیں۔

پاکستان تحریک انصاف کے قائم مقام چیئرمین بیرسٹر گوہر علی خان نے گزشتہ دنوں میڈیا سے بات کرتے ہوئے کہا تھا کہ وفاقی آئینی عدالت کے فیصلے سے کئی قانونی پیچیدگیاں پیدا ہوئی ہیں اور اس کے اثرات سیاسی شخصیات کے ساتھ عام شہریوں پر بھی پڑ رہے ہیں۔

ان کے مطابق پشاور ہائی کورٹ کو 10 نومبر کے لیے مقرر مقدمات کاز لسٹ سے انتظامی طور پر خارج نہیں کرنے چاہییں تھے بلکہ عدالت کو خود سماعت کر کے طے کرنا چاہیے تھا کہ وفاقی آئینی عدالت کا حکم ان مقدمات پر کس حد تک لاگو ہوتا ہے۔

انھوں نے اعلان کیا کہ پی ٹی آئی اس فیصلے کو واپس لینے یا اس پر نظرثانی کے لیے وفاقی آئینی عدالت سے رجوع کرے گی۔

آرٹیکل (1)245 کے تحت مسلح افواج وفاقی حکومت کی ہدایت پر بیرونی جارحیت کے خلاف دفاع کرتی ہیں اور قانون کے تابع سول انتظامیہ کی معاونت بھی کر سکتی ہیں۔

آرٹیکل (3)245 کہتا ہے کہ جس علاقے میں فوج آرٹیکل 245 کے تحت سول انتظامیہ کی معاونت کر رہی ہو، وہاں ہائی کورٹ آرٹیکل 199 کے تحت اپنا اختیار استعمال نہیں کرے گی۔

آرٹیکل (4)245 مزید کہتا ہے کہ فوج کی معاونت شروع ہونے کے بعد اس علاقے سے متعلق ہائی کورٹ میں دائر ہونے والی ایسی کارروائیاں، اس مدت تک معطل رہیں گی جس دوران فوج سول انتظامیہ کی معاونت کر رہی ہو۔ تاہم فوج کی تعیناتی شروع ہونے سے پہلے سے زیرِ سماعت مقدمات کے لیے آرٹیکل (3)245 میں واضح استثنا موجود ہے۔

امریکی صدر ڈونلڈ ٹرمپ کی جانب سے ایران کے خلاف مزید فوجی حملے فی الحال روکنے کے اعلان کے بعد منگل کو تیل کی قیمتوں میں کمی دیکھی گئی۔

گرین وچ معیاری وقت کے مطابق 0246 بجے (جو پاکستانی وقت کے مطابق صبح 7 بج کر 46 منٹ بنتا ہے) برینٹ خام تیل کے مستقبل کے سودے 70 سینٹ، یا 0.75 فیصد، کمی کے ساتھ 91.88 ڈالر فی بیرل پر آ گئے۔ اس کے علاوہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل کے فیوچرز (مستقبل کے سودے) 78 سینٹ، یا 0.90 فیصد، کمی کے بعد 86.07 ڈالر فی بیرل پر پہنچ گئے۔

برینٹ خام تیل گذشتہ سیشن میں 5.85 فیصد کمی کے ساتھ بند ہوا تھا، اور اس دوران اس کی قیمت 31 اگست کے بعد کی کم ترین سطح تک پہنچ گئی تھی۔

صدر ٹرمپ نے پیر کو کہا کہ وہ فی الحال ایران کے خلاف نئی فوجی کارروائیوں سے گریز کرنے کا ارادہ رکھتے ہیں۔ انھوں نے کہا کہ یہ فیصلہ خطے کے کئی ممالک، بشمول قطر کے وزیرِاعظم، کی جانب سے وائٹ ہاؤس میں ہونے والی بات چیت کے دوران کی گئی اپیلوں کے بعد کیا گیا۔