ترکیہ اور قطر نے باہمی دفاعی معاہدے پر دستخط کر دیے، ترک ایوانِ صدر

دی اردو پوسٹ (مانیٹرنگ ڈیسک): ترکیہ اور قطر نے جمعے کے روز باہمی دفاعی معاہدے پر دستخط کیے ہیں۔ ترک صدر رجب طیب اردوغان کے دفتر کے مطابق یہ معاہدہ ایک ایسے وقت پر طے پایا ہے جب ترک صدر نے استنبول میں قطر کے امیر شیخ تمیم بن حمد آل ثانی سے ملاقات۔

عرب نیوز کے مطابق ترک ایوانِ صدر کی جانب سے سماجی رابطے کی ویب سائٹ ’ایکس‘ پر جاری بیان میں کہا گیا کہ ’صدر اردوغان نے اِس عزم کا اظہار کیا کہ ہم خلیجی خطے میں جنگ دوبارہ شروع ہونے کے اِمکانات کو روکنے، مذاکرات کی راہ ہموار کرنے اور امن کے قیام کے لیے مل کر کام جاری رکھیں گے۔‘ تاہم بیان میں دفاعی معاہدے کی تفصیلات نہیں بتائی گئیں۔

بیان میں مزید کہا گیا کہ ’صدر اردوغان نے کہا کہ ترکیہ اور قطر کے درمیان آج طے پانے والا باہمی دفاعی معاہدہ ہماری برادرانہ دوستی میں ایک نئی جہت کا اضافہ کرے گا۔‘۔

واضح رہے کہ رواں سال اگست میں ترکیہ، سعودی عرب اور پاکستان نے مکہ مکرمہ میں مشترکہ دفاعی معاہدے پر دستخط کیے تھے، جس کے تحت تینوں سنی مسلم ممالک، جو امریکہ کے اتحادی بھی ہیں، ایسے وقت میں دفاعی تعاون کے لیے اکٹھے ہوئے جب خطے کے مختلف حصوں میں تنازعات جاری ہیں۔

ترک پارلیمان نے گزشتہ ہفتے اِس معاہدے کی توثیق کر دی تھی، جس کے بعد ترکیہ کے لیے سعودی عرب کو فوجی مدد فراہم کرنے کی راہ ہموار ہو گئی ہے۔ سعودی عرب کو یمن کے ایران نواز حوثی باغیوں کے حملوں کا سامنا ہے اور وہ اِن حملوں کو روکنے کی کوشش کر رہا ہے۔

اگست میں تینوں علاقائی طاقتوں کے درمیان طے پانے والے معاہدے کے تحت کسی ایک ملک پر حملے کو تینوں ممالک پر حملہ تصور کیا جائے گا۔