سینیگال کے ساحل کے قریب تارکین وطن کی کشتی ڈوب گئی، 34 افراد ہلاک، متعدد لاپتا

دی اردو پوسٹ (مانیٹرنگ ڈیسک): سینیگال کے ساحل کے قریب تارکین وطن کی کشتی الٹنے سے کم از کم 34 افراد ہلاک ہوگئے، جبکہ متعدد افراد تاحال لاپتا ہیں۔

غیر ملکی خبر رساں ادارے کے مطابق سینیگال کی وزارت داخلہ نے بتایا کہ لکڑی کی چھوٹی کشتی ملک کے شمال مغربی علاقے کیبیمیر کے ساحل کے قریب حادثے کا شکار ہوئی۔

کشتی دارالحکومت ڈاکار اور شمالی شہر سینٹ لوئس کے درمیان سمندر میں الٹی، جو اسپین کے کینری جزائر کی جانب رواں دواں تھی۔

حکام کے مطابق حادثے کے بعد سرچ اینڈ ریسکیو آپریشن جاری ہے، اب تک ایک شخص کو زندہ بچالیا گیا ہے، تاہم لاپتا افراد کی تعداد کا تعین نہیں ہوسکا۔

سینیگال کی تارکین وطن کی مدد کرنے والی تنظیم بوزا فائی کے سربراہ سالیو دیوف کے مطابق اب تک ملنے والی تمام لاشیں سینیگال کے شہریوں کی ہیں، جبکہ کشتی میں سوار دیگر افراد کی قومیت معلوم نہیں ہوسکی۔

سینیگال کے صدر باسرو دیومائے فائے نے حادثے میں ہلاک ہونے والوں کے اہل خانہ سے تعزیت کا اظہار کرتے ہوئے شہریوں پر زور دیا ہے کہ وہ خطرناک سمندری راستوں کے ذریعے یورپ جانے کی کوشش میں اپنی زندگیاں خطرے میں نہ ڈالیں۔

صدر نے سوشل میڈیا پلیٹ فارم ایکس پر بیان میں انسانی اسمگلنگ کے نیٹ ورکس کے خلاف کارروائیاں تیز کرنے کا عزم بھی ظاہر کیا۔

دوسری جانب اسپین کے جزیرے ایل ہیرو میں تارکین وطن کی آمد میں اضافے کے بعد ہفتے کو ہنگامی حالت نافذ کردی گئی۔

مقامی حکام کے مطابق نومبر کے آغاز سے اب تک تقریباً 30 کشتیوں کے ذریعے 3 ہزار 300 سے زائد افراد جزیرے پہنچ چکے ہیں۔

تارکین وطن کے حقوق کے لیے کام کرنے والی تنظیم واکنگ بارڈرز کے مطابق جنوری سے مئی 2026ء کے دوران بحر اوقیانوس کے راستے کینری جزائر پہنچنے کی کوشش میں 635 افراد ہلاک ہوئے۔

اعداد و شمار کے مطابق سینیگال میں 2026 کی دوسری سہ ماہی کے دوران تقریباً ہر 4 میں سے ایک نوجوان بے روزگار تھا، جبکہ روزگار کے محدود مواقع اور بہتر مستقبل کی تلاش نوجوانوں کو خطرناک سمندری سفر پر مجبور کرنے والے عوامل میں شامل ہیں۔