نیتن یاہو کے اقتدار کا سورج غروب ہوگیا؛ اتحاد کے نام پر بیوقوف نہ بنائیں؛ متوقع وزیراعظم

اسلام آباد (قومی بیورو): اسرائیل کے سابق آرمی چیف اور وزارت عظمیٰ کے امیدوار گادی آئزن کوٹ نے نگراں وزیراعظم بنجمن نیتن یاہو پر تنقید کرتے ہوئے کہا ہے کہ وہ انتخابات میں شکست کھا چکے ہیں لیکن اس کے باوجود قومی اتحاد کی حکومت بنانے کی اپیل کرکے سیاسی چالیں چل رہے ہیں۔

خبر رساں ادارے کی رپورٹ کے مطابق گادی آئزن کوٹ نے ہفتے کے روز اپنے بیان میں نیتن یاہو کی جانب سے قومی اتحاد کی حکومت تشکیل دینے کی پیشکش کو محض ایک سیاسی حربہ قرار دیا۔

انہوں نے کہا کہ نیتن یاہو ایک طرف مذاکرات کی دعوت دے رہے ہیں حالانکہ مذاکرات پہلے ہی جاری ہیں، جبکہ دوسری جانب قومی اتحاد کی بات کرنے کے باوجود معاشرے میں تقسیم اور سیاسی کشیدگی کو ہوا دے رہے ہیں۔

آئزن کوٹ کا کہنا تھا کہ نیتن یاہو ایسے ظاہر کررہے ہیں جیسے وہ قومی اتحاد چاہتے ہوں، لیکن ان کے اقدامات اس کے برعکس ہیں اور وہ ملک میں اختلافات کو مزید بڑھا رہے ہیں۔

سابق اسرائیلی آرمی چیف نے واضح کیا کہ وہ نیتن یاہو کی ان سیاسی چالوں سے متاثر نہیں ہوں گے۔ ان کے بقول، ’’یہ چالیں مجھ پر کام نہیں کرتیں۔‘‘۔