آئرلینڈ میں عالمی رہنما بال بال بچ گئے؛ گرینڈ ڈنر کے مقام سے بم برآمد

اسلام آباد (قومی بیورو): آئرلینڈ میں عالمی رہنماؤں کی بڑی بیٹھک کے بعد ہونے والے عشائیہ کے مقام سے ایک بم ملنے پر سیکیورٹی اقدامات پر سوالیہ نشان کھڑے کردیے۔

خبر رساں ادارے رائٹرز کے مطابق یہ واقعہ جمعے کے روز میریئن اسکوائر میں پیش آیا جہاں ایک دفتر کی عمارت میں مشتبہ آلہ موجود ہونے کی اطلاع پولیس کو موصول ہوئی تھی۔

آئرش پولیس کے مطابق ابتدائی جائزے کے بعد دفاعی افواج کی ایکسپلوسیو آرڈیننس ڈسپوزل ٹیم کو طلب کیا گیا۔ فوجی ماہرین نے موقع پر پہنچ کر مشتبہ آلے کا معائنہ کیا اور اسے محفوظ طریقے سے ناکارہ بنا دیا۔

پولیس نے اپنے بیان میں دھماکا خیز آلے کو ابتدائی طور پر سادہ ساختہ لیکن قابلِ استعمال قرار دیا ہے۔ حکام نے واقعے کی تحقیقات شروع کردیں تاہم یہ واضح نہیں کیا گیا کہ دھماکا خیز مواد عمارت میں کب رکھا گیا تھا اور اس کے پیچھے کون ملوث ہوسکتا ہے۔

یہ واقعہ ایسے وقت پیش آیا جب ایک روز قبل اسی علاقے میں یورپی سیاسی برادری کے سربراہی اجلاس میں شریک عالمی رہنماؤں کے اعزاز میں عشائیہ دیا گیا تھا۔

آئرش وزیراعظم میہال مارٹن کی میزبانی میں نیشنل گیلری آف آئرلینڈ میں ہونے والی تقریب میں فرانس کے صدر ایمانوئل میکرون، برطانوی وزیراعظم اینڈی برنہم اور کینیڈا کے وزیراعظم مارک کارنی سمیت متعدد رہنماؤں نے شرکت کی تھی۔