وزیراعظم مودی سے سوال پوچھنے والی صحافی کو ویزے کے باوجود انڈیا میں داخلے روکنے کا معاملہ: ’اوپر سے آنے والے احکامات‘ کس کے تھے؟

اسلام آباد (قومی بیورو): ’مجھے انڈیا کا ویزا مل گیا تھا اور مجھے آج صبح انڈین ریاست حیدرآباد میں ہونے والے سمٹ میں شرکت کے لیے روانہ ہونا تھا جہاں مجھے میڈیا کے مستقبل اور صحافتی آزادی پر ایک پینل مباحثے میں شریک ہونا تھا۔ تاہم وزارتِ داخلہ میں ’اوپر سے آنے والے احکامات‘ کے تحت میرا ویزا منسوخ کر دیا گیا۔‘۔

سماجی رابطے کی ویب سائٹ ایکس پر 11 نومبر کو اپنے ویڈیو پیغام میں یہ جملے کہے ہیں ناروے کی صحافی ہیلا لینگ نے جنھیں انڈیا میں منعقد ہونے والے ’انڈیا سمٹ 2026‘ میں شرکت کرنا تھی، تاہم ان کے ویزا منسوخی کے دعوے کے بعد ایک تنازع کھڑا ہو گیا ہے۔

ہیلا لینگ نے اپنی طویل پوسٹ میں انڈین وزیرِ داخلہ امت شاہ پر بھی تنقید۔

دوسری جانب کانگریس کا دعویٰ ہے کہ صرف ہیلا لینگ ہی نہیں بلکہ تقریباً 116 غیر ملکی مندوبین کو بھی انڈیا میں داخلے کی اجازت نہیں دی گئی۔

اس معاملے پر وزارتِ خارجہ کے ترجمان رندھیر جیسوال نے بھی ردِعمل دیا ہے۔

تلنگانہ حکومت اور سمردھی بھارت فاؤنڈیشن کے اشتراک سے منعقد ہونے والی کانفرنس ’بھارت سمٹ: فورجنگ اے نیو ورلڈ‘ 13 اور 14 نومبر کو حیدرآباد میں منعقد ہوئی۔

یہ کانفرنس انڈیا کے 80ویں یومِ آزادی اور جواہر لعل نہرو کی 137ویں سالگرہ کی مناسبت سے منعقد کی گئی تھی۔

منتظمین کے مطابق اس کانفرنس میں انڈیا سمیت 70 سے زائد ممالک سے ایک ہزار سے زیادہ مندوبین کو مدعو کیا گیا تھا۔

تاہم اب اس کانفرنس میں شرکت کے لیے آنے والے غیر ملکی مہمانوں کے حوالے سے تنازع کھڑا ہو گیا ہے۔

منتظمین نے ہیلا لینگ کو سمٹ میں ایک پینل مباحثے میں شرکت کے لیے مدعو کیا تھا۔ ان کے مطابق ابتدا میں انھیں ویزا جاری کر دیا گیا تھا، لیکن آخری وقت میں اسے منسوخ کر دیا گیا۔

ہیلا لینگ نے اس بارے میں سوشل میڈیا پلیٹ فارم ایکس پر ایک ویڈیو بھی پوسٹ کی جس میں انھوں نے دعویٰ کیا ہے کہ ویزا منسوخ ہونے کے باعث وہ کانفرنس میں شرکت نہیں کر سکیں۔

اپنی ویڈیو میں ہیلا لینگ نے الزام عائد کرتے ہوئے کہا کہ ’یہ پیغام امت شاہ کے لیے ہے۔ آج مجھے پہلی بار دنیا کی سب سے بڑی جمہوریت، انڈیا جانا تھا، اس لیے میں بہت پُرجوش تھی۔ میں نے سفر کی مکمل تیاری کر رکھی تھی۔ میرا سامان پیک تھا، میرے پاسپورٹ پر ویزا بھی لگا ہوا تھا اور میں انڈیا روانہ ہونے کے لیے پوری طرح تیار تھی۔‘۔

انھوں نے مزید کہا کہ ’لیکن ایئرپورٹ روانہ ہونے سے صرف 10 منٹ پہلے مجھے ناروے میں انڈین سفارت خانے سے فون آیا۔ ’انھوں نے مجھ سے کہا کہ آپ آج انڈیا نہیں جا سکتیں۔ ‘۔

’یہ سن کر میں حیران رہ گئی کیونکہ میرے پاس سیاسی منظوری بھی تھی، ویزا بھی تھا اور حیدرآباد میں ہونے والی کانفرنس میں میری شرکت متوقع تھی۔‘۔

ہیلا لینگ نے کہا: ’مجھے اس کانفرنس میں میڈیا، صحافتی آزادی اور جمہوریت کے موضوعات پر گفتگو کے لیے مدعو کیا گیا تھا۔ تاہم مجھے بتایا گیا کہ ویزا جاری ہونے کے باوجود مجھے انڈیا میں داخلے کی اجازت نہیں دی جائے گی۔‘۔

انھوں نے مزید کہا کہ ’امت شاہ، یہ وہ مرحلہ ہے جہاں آپ کا کردار سامنے آتا ہے۔ یہ معاملہ وزارتِ داخلہ سے متعلق معلوم ہوتا ہے، جو آپ کے دائرہ اختیار میں آتی ہے۔ کیونکہ اسی وزارت نے مجھے انڈیا میں داخلے کی اجازت نہ دینے کا فیصلہ کیا ہے۔‘۔

ہیلا لینگ نے کہا کہ ’میں نہیں جانتی کہ ایسا کیوں کیا گیا، لیکن میرا خیال ہے کہ یہ فیصلہ سیاسی بنیادوں پر کیا گیا ہے۔‘۔

انھوں نے الزام عائد کیا کہ ’مئی 2026 میں ناروے کے دارالحکومت اوسلو میں میں نے انڈین وزیرِ اعظم نریندر مودی سے ایک سوال کیا تھا۔ اس کے لیے میں نے صحافتی آزادی کا حق استعمال کیا تھا۔ ممکن ہے اس فیصلے کا اس سے کوئی تعلق ہو۔‘۔

انھوں نے کہا کہ ’میں نے اپنے ناروے کے اخبار اور آن لائن میڈیا میں شائع ہونے والے مضامین کے ذریعے انڈیا کے عوام کے سامنے اپنے خیالات کا اظہار کیا تھا۔ میں نے نریندر مودی اور ان کی حکومت پر تنقید بھی کی تھی۔ مجھے یہ بھی شبہ ہے کہ شاید میرا ویزا اسی وجہ سے منسوخ کیا گیا ہو۔‘۔

انھوں نے دعویٰ کیا کہ ’میں یہ بھی سوچ رہی ہوں کہ کہیں یہ فیصلہ میرے مضامین میں دیے گئے خیالات یا ان انٹرویوز کی وجہ سے تو نہیں کیا گیا جو میں نے کیے تھے۔‘۔

ہیلا لینگ پہلی بار چند ماہ قبل اس وقت خبروں میں آئیں تھیں جب انڈین وزیرِ اعظم نریندر مودی ناروے کے دارالحکومت اوسلو کے دورے پر تھے۔

اس موقع پر نریندر مودی اور ناروے کے وزیرِ اعظم یوناس گاہر سٹورے کے درمیان دوطرفہ مذاکرات کے بعد مشترکہ پریس کانفرنس منعقد ہوئی تھی۔

پریس کانفرنس کے اختتام پر جب دونوں رہنما روانہ ہو رہے تھے، تو ہیلا لینگ نے نریندر مودی سے سوال کیا کہ ’وزیرِ اعظم مودی، آپ دنیا کے آزاد ترین میڈیا کے سوالات کا جواب کیوں نہیں دیتے؟‘۔

ہیلا لینگ نے انڈیا میں صحافتی آزادی اور انسانی حقوق کی صورتحال کے بارے میں بھی سوالات اٹھائے تھے تاہم نریندر مودی نے ان سوالات کا جواب نہیں دیا اور وہاں سے روانہ ہو گئے۔

انڈین وزارتِ خارجہ کے ترجمان رندھیر جیسوال نے اس معاملے پر صحافیوں سے گفتگو کرتے ہوئے کہا کہ ویزا جاری کرنا یا مسترد کرنا ہر ملک کی حکومت کا خودمختار اختیار ہے۔

انھوں نے کہا کہ ’ویزا جاری کرنے سے متعلق فیصلے کا اختیار ہر ملک کی حکومت کے پاس ہوتا ہے۔ یہ حکومت کے خودمختار دائرہ اختیار میں آتا ہے۔ اس معاملے پر مجھے صرف اتنا ہی کہنا ہے۔‘۔

دوسری جانب کانگریس رہنما اور یو پی اے حکومت میں سابق وزیرِ خارجہ سلمان خورشید کے علاوہ سمٹ کے منتظمین اور سمردھی فاؤنڈیشن کے پشپ راج دیشپانڈے نے بھی ہیلا لینگ کے الزامات کی حمایت کی ہے۔

انھوں نے مزید کہا کہ ’جب دنیا بھر سے اتنے لوگ انڈیا آنا چاہتے ہیں تو انھیں جان بوجھ کر کیوں روکا جا رہا ہے؟ کچھ افراد کو آنے سے روکا جا رہا ہے جبکہ دوسروں کو اجازت دی جا رہی ہے۔ کچھ کو انتظار کرنے کے لیے کہا جا رہا ہے اور بعض کو ہوائی اڈے سے ہی واپس بھیجا جا رہا ہے۔ بعض افراد کے ویزے تو آخری وقت میں منسوخ کر دیے جاتے ہیں۔‘۔

سلمان خورشید نے کہا کہ حکومت کو اس معاملے پر وضاحت دینی چاہیے۔

انھوں نے کہا کہ ’ہم نے 116 افراد کے لیے ویزا منظوری حاصل کرنے کی کوشش کی تھی۔ ہمیں بتایا گیا تھا کہ ہر مدعو فرد کے لیے الگ منظوری درکار ہو گی۔ اسی کے مطابق ہم نے مکمل فہرست جمع کرائی، لیکن کچھ افراد کو منظوری مل گئی جبکہ دوسروں کی درخواستیں مسترد کر دی گئیں۔‘۔

سلمان خورشید کے مطابق ’حکومت کو یہ واضح کرنا چاہیے کہ بعض افراد کو منظوری کیوں نہیں دی گئی۔‘۔

انھوں نے کہا کہ ’چونکہ یہ ایک سفارتی معاملہ ہے، اس لیے ہم واپس بھیجے گئے افراد کے بارے میں زیادہ کچھ نہیں کہہ سکتے۔ تاہم بہت سے مندوبین کو ہوائی اڈے پر امیگریشن کے عمل کے دوران سنگین مشکلات کا سامنا کرنا پڑا۔‘۔

ان کے مطابق آئیوری کوسٹ کے ایک سابق صدر کو بھی امیگریشن کے مرحلے پر ایسی ہی مشکلات کا سامنا کرنا پڑا اور انھیں ہراساں کیا گیا۔

پشپ راج دیشپانڈے نے کہا کہ ’ہم نے اپنی جانب سے تمام قواعد و ضوابط کی سختی سے پابندی کی تھی۔ متعدد مندوبین کو سیاسی منظوری بھی مل چکی تھی۔ اگر اس کے باوجود انھیں واپس بھیجا جا رہا ہے تو اس کے پیچھے یقیناً کوئی بڑا مسئلہ موجود ہے۔‘۔

سمردھی فاؤنڈیشن کے منتظم پشپ راج دیشپانڈے نے کہا کہ ہیلا لینگ کا معاملہ کوئی واحد مثال نہیں ہے۔

ان کا کہنا تھا کہ ’کئی سفارت خانوں کے اہلکار یہ جانچ رہے ہیں کہ آیا کسی شخص نے حکومت پر تنقید تو نہیں کی۔‘۔

تاہم انھوں نے یہ بھی کہا کہ وہ نہیں جانتے کہ آیا انڈیا کی حکومت نے سفارت خانوں کو ایسی کوئی ہدایات دی ہیں یا نہیں۔

ان کے مطابق ’میں نہیں جانتا کہ انڈین حکومت کی جانب سے ایسی ہدایات دی گئی ہیں یا نہیں، لیکن بعض سفارت خانوں کے اہلکار سوشل میڈیا پوسٹس کا جائزہ لے رہے ہیں۔ سلمان خورشید بھی اس بارے میں بات کر چکے ہیں۔ بعض صورتوں میں یہ اہلکار متعلقہ افراد کی ویزا درخواستیں قبول نہیں کرتے یا سیاسی منظوری ملنے کے باوجود انھیں مسترد کر دیتے ہیں۔‘۔

انڈیا سمٹ ایک بین الاقوامی کانفرنس ہے جو گذشتہ سال کی طرح اس سال بھی انڈیا کی ریاست تلنگانہ میں منعقد کی گئی۔ اس کانفرنس میں انڈیا سمیت مختلف ممالک کے ماہرین، سفارت کار، سیاست دان، اساتذہ اور دانشور شریک ہوتے ہیں۔

کانفرنس کے دوران متعدد سیشنز اور مباحثوں کا انعقاد کیا جاتا ہے، جن میں دنیا کو درپیش چیلنجز، عالمی معاملات میں انڈیا کا کردار، مختلف ممالک کے ساتھ انڈیا کے تعلقات اور جمہوری نظام کو مضبوط بنانے جیسے موضوعات زیرِ بحث آتے ہیں۔

اس سال کی کانفرنس میں کانگریس رہنما راہل گاندھی سمیت کئی نمایاں سیاسی شخصیات کے علاوہ مختلف ممالک کے دانشوروں اور سیاسی رہنماؤں نے بھی شرکت کی۔ منتظمین کے مطابق ان میں سے کئی افراد کے سیاسی نظریات کانگریس پارٹی سے ہم آہنگ ہیں۔

سمٹ کے منتظم اور سمردھی فاؤنڈیشن کے رکن پشپ راج دیشپانڈے نے کہا کہ ’تلنگانہ صرف سرمایہ کاری کے لیے ہی نہیں بلکہ خیالات کے تبادلے کے لیے بھی کھلا ہے۔ اسی لیے بہت سے ترقی پسند حلقے اس کانفرنس کو گلوبل ساؤتھ کا سیاسی ڈیووس' قرار دے رہے ہیں۔‘۔

انھوں نے مزید کہا کہ ’آج دنیا کو توانائی کی بڑھتی قیمتوں اور مہنگائی سمیت متعدد مسائل کا سامنا ہے۔ اگر ہم چاہتے ہیں کہ عام لوگ ان مسائل کا بوجھ نہ اٹھائیں تو ہمیں یہ بھی بات کرنا ہو گی کہ مغربی ایشیا کے ممالک کے ساتھ کس طرح روابط بڑھائے جائیں، ایران کے ساتھ کن امور پر گفتگو ہونی چاہیے، اور روس، امریکہ اور وینزویلا کے ساتھ کس نوعیت کے تعلقات قائم کیے جائیں۔‘۔

پشپ راج دیشپانڈے نے کہا کہ ’ہمیں عدمِ وابستگی کی تحریک اور جواہر لعل نہرو کی وراثت ملی ہے۔ ہم تمام ممالک کے ساتھ رابطہ رکھتے ہیں۔ ہمارا مقصد یہ جاننا ہے کہ دوسرے ممالک کو کن چیلنجز کا سامنا ہے اور وہ انڈیا سے کیا توقعات رکھتے ہیں۔‘۔

دوسری جانب تلنگانہ میں بی جے پی کے رہنماؤں نے اس کانفرنس پر تنقید کرتے ہوئے اسے ’اینٹی انڈیا سمٹ‘ قرار دیا ہے۔ تاہم کانگریس رہنما اور سابق وزیرِ خارجہ سلمان خورشید نے اس الزام کی مذمت کی ہے۔

اس تنقید کے جواب میں پشپ راج دیشپانڈے نے دعویٰ کیا کہ ’یہ صرف خیالات کے تبادلے کا ایک فورم ہے۔ یہاں کسی متنازع موضوع پر بحث نہیں ہوتی۔ جو کچھ بھی یہاں ہو رہا ہے وہ ملک اور عوام کے فائدے کے لیے ہے۔‘۔

انھوں نے مزید کہا کہ ’ہماری خواہش ملک اور انڈیا کے عوام کی بہتری ہے۔ اسی مقصد کے تحت ہم مختلف ممالک کے نمائندوں کو ایک جگہ جمع کر رہے ہیں۔ اس کا بنیادی مقصد ایک دوسرے کے بہترین تجربات اور خیالات کو سمجھنا اور ان کا تبادلہ کرنا ہے۔‘۔

نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔