بانی پی ٹی آئی کی بہن کی طبیعت خراب، جیل سے اسپتال منتقل

لاہور (بیورو رپورٹ): لاہور: بانی پی ٹی آئی کی بہن نورین خان نیازی کو طبیعت خراب ہونے پر جیل سے اسپتال منتقل کر دیا گیا۔

وکیل رانا مدثر عمر کے مطابق نورین نیازی کو دل میں تکلیف ہوئی ہے اور انہیں جیل سے پنجاب کارڈیالوجی منتقل کر دیا گیا جہاں ان کے ابتدائی ٹیسٹ کیے جا رہے ہیں۔

نورین نیازی کوٹ لکھپت جیل میں نظربند ہیں۔

ہائیکورٹ نے بانی پی ٹی آئی کی بہن ڈاکٹر عظمی خانم اور نورین نیازی کی نظر بندی کا نوٹیفیکیشن فوری معطل کرنے کی استدعا مسترد کر دی تھی۔

جسٹس عبہر گل خان نے درخواستوں پر سماعت کی، درخواست گزاروں کی جانب سے رانا مدثر عمر پیش ہوئے اور عدالت سے نظر بندی کا نوٹیفکیشن معطل کرنے کی استدعا۔

وکیل رانا مدثر عمر نے مؤقف اختیار کیا کہ دونوں گھریلو خواتین ہیں، جبکہ ڈاکٹر عظمیٰ خانم مقدمے میں بے قصور قرار دی جاچکی ہیں۔

انہوں نے بتایا کہ ٹرائل کورٹ کے فیصلے کی کاپی بھی درخواست کے ساتھ موجود۔

عدالت نے نظر بندی کا نوٹیفکیشن فوری معطل کرنے کی استدعا مسترد کردی اور ریمارکس دیے کہ متعلقہ فریقین سے رپورٹ منگوا لیتے ہیں۔

عدالت نے فریقین کو نوٹسز جاری کرتے ہوئے جواب طلب کرلیا اور قرار دیا کہ فریقین کا مؤقف سامنے آنے کے بعد نظر بندی کے نوٹیفکیشن کی معطلی سے متعلق فیصلہ کیا جائے۔