حکومت کو ون کانسٹیٹیوشن کا قانونی قبضہ مل گیا ہے: محسن نقوی

اسلام آباد (قومی بیورو): وفاقی وزیر داخلہ محسن نقوی نے کہا ہے کہ حکومت کو ون کانسٹیٹیوشن کا قانونی قبضہ مل گیا ہے۔

اسلام آباد میں وفاقی وزرا کے ہمراہ پریس کانفرنس کرتے ہوئے محسن نقوی کا کہنا تھا کہ کوشش ہے کہ چند ماہ میں اس بلڈنگ کو ایک ہوٹل میں تبدیل کردیں۔

وفاقی وزیر داخلہ نے کہا کہ جے آئی ٹی کی رپورٹ کے بعد حکومت کو ون کانسٹیٹیوشن کا قانونی قبضہ مل گیا ہے۔ بڑے عرصے سے اس رپورٹ کے منتظر تھے۔

ان کا کہنا تھا کہ اسلام آباد میں سرکاری زمینوں پر جس بےدردی سے قبضہ کیا گیا آپ اندازہ نہیں کرسکتے۔ جس دن ہم نے قبضہ لینے کی کوشش کی اس دن عجیب ماحول بنایا گیا۔ جیسے ہم سے کوئی جرم ہوگیا ہو۔

احسن اقبال نے کہا کہ کابینہ کے سامنے آج جے آئی ٹی رپورٹ پیش کی گئی، ون کانسٹیٹیوشن ایونیو کی دوبارہ نیلامی کی سفارش کی گئی ہے، ون کانسٹیٹیوشن ایونیو کی عمارت کا نیا نام رکھا جائے۔

وفاقی وزیر نے کہا کہ اس معاملے میں وزیراعظم کی ہمیں پوری سپورٹ رہی۔

انہوں نے کہا کہ ہمارا ایک ہی مقصد تھا دہرا معیار نہیں، غریب اور امیر کےلیے دہرا معیار نہ ہو، ایک ہی معیار ہو۔ پروجیکٹ کے متاثرین کو رقم واپس ادا کی جائے گی۔

محسن نقوی کا کہنا تھا کہ کوئی بھی جگہ ہو، اگر سرکاری زمین ہے تو ہم نے واگزار کرانی ہے۔ تجاوزات کے خلاف آپریشن میں کہاں کہاں سے دباؤ آیا میں بتا نہیں سکتا۔ سرکاری زمین پر قبضہ کرنے والے کسی رعایت کے مستحق نہیں۔ سرکاری زمین ہر صورت واگزار کرائیں گے۔