ٹرمپ کا ایران پر فوجی حملے روکنے کا مشروط اشارہ

دی اردو پوسٹ (مانیٹرنگ ڈیسک): امریکی صدر ڈونلڈ ٹرمپ نے ایران پر مزید فوجی حملے روکنے سے متعلق مشروط اشارہ دے دیا ہے۔

برطانوی خبر رساں ادارے رائٹرز کے مطابق امریکی صدر نے اپنے مشیروں کو اشارہ دیا ہے کہ اگر ایران یا یمن کے حوثی کئی نئی اشتعال انگیزی نہیں کرتے تو وہ تہران پر مزید فوجی حملے روک سکتے ہیں۔

رپورٹ کے مطابق ایران پر مزید حملے روکنے سے متعلق فیصلہ سعودی عرب اور ترکی جیسے علاقائی اتحادیوں کے پر زور اصرار کے ساتھ امریکی عوام کی جنگ مخالفت سمیت دیگر عوامل کے باعث ہوا ہے۔

رپورٹ کے مطابق ان عوامل میں اقتصادی پابندیوں اور بحری ناکہ بندی کے موثر اثرات کا تناظر بھی شامل ہے تاہم اہمیت حالیہ وسط مدتی انتخابات میں ٹرمپ کی جماعت کی شکست کو حاصل ہے۔

رپورٹ کے مطابق سعودی عرب کے ولی عہد محمد بن سلمان اور ترک صدر رجب طیب اردوان نے حالیہ ٹیلیفونک رابطوں میں ٹرمپ پر زور دیا تھا کہ وہ مکمل طور پر جنگ شروع نہ کریں کیونکہ اقتصادی پابندیاں پہلے ہی ایران کو کمزور کررہی ہیں۔

جنگ کے باعث ایندھن کی عالمی قیمتوں میں اضافےکی 55 فیصد امریکیوں نے مخالفت کی، اسے ہی نائب صدر جے ڈی وینس نے شکست کی بڑی وجہ قرار دیا ہے۔

دوسری طرف اسرائیلی دباؤ اور ممکنہ ہنگامی صورتحال کے پیش نظر امریکی فوج مشرق وسطیٰ میں اپنی تیاری برقرار رکھے ہوئے ہے، اس کے باوجود امریکی ہتھیاروں کے ذخائر میں کمی اور مزید حملے محدود فوائد کے باعث تشویش پائی جاتی ہے۔

رپورٹ کے مطابق ٹرمپ کے حالیہ تبصروں نے ایران سے بڑی جنگ کے دوبارہ آغاز کے امکانات محدود کردیے ہیں۔ وائٹ ہاؤس کے ایک اہلکار نے کہا کہ کمانڈر انچیف کی حیثیت سے صدر ہی فیصلہ ساز ہیں، آبنائے ہرمز اور ایرانی معیشت کی تباہی کے ساتھ امریکا مضبوط پوزیشن پر براجمان ہے۔