پاکستانی فوجیوں کی قربانیاں برطانوی تاریخ کا اہم حصہ ہیں، میجر جنرل کارل ہیرس

دی اردو پوسٹ (مانیٹرنگ ڈیسک): برطانوی فوج کے اعلیٰ افسر میجر جنرل کارل ہیرس نے پہلی اور دوسری عالمی جنگ میں برصغیر، بالخصوص موجودہ پاکستان کے علاقوں سے تعلق رکھنے والے مسلمان فوجیوں کی خدمات اور قربانیوں کو زبردست خراجِ تحسین پیش کرتے ہوئے کہا ہے کہ برطانیہ کے دفاع اور آزادی کے تحفظ میں جنوبی ایشیا کے فوجیوں نے تاریخی کردار ادا کیا۔

برطانوی فوج کے میجر جنرل کارل ہیرس نے ان خیالات کا اظہار جنگ بندی کی یاد میں منائے جانے والے دن آرمسٹِس ڈے کے موقع پر پاکستانی نژاد برطانوی کاروباری شخصیت اور برطانیہ و یورپ میں حلال گوشت کے بڑے سپلائرز میں شمار ہونے والی کمپنی طارق حلال میٹس کے سربراہ ڈاکٹر طارق شیخ کے ساتھ آرمڈ فورسز کووننٹ پر دستخط کی تقریب سے خطاب کرتے ہوئے کیا۔

معاہدے پر ڈاکٹر طارق شیخ نے اپنی کمپنی طارق حلال میٹس جبکہ میجر جنرل کارل ہیرس نے برطانوی وزارتِ دفاع کی جانب سے دستخط کیے۔ معاہدے کا مقصد برطانوی مسلح افواج کے حاضر سروس اور سابق اہلکاروں سمیت ان کے اہلِ خانہ کو روزگار، سماجی سہولتوں اور دیگر شعبوں میں مساوی مواقع فراہم کرنا ہے۔

تقریب سے خطاب کرتے ہوئے میجر جنرل کارل ہیرس نے کہا کہ جنگوں میں جانوں کا نذرانہ پیش کرنے والے فوجیوں کی یاد ہمیں اس حقیقت کا احساس دلاتی ہے کہ برطانیہ کی آزادی اور سلامتی کے لیے کتنی بڑی قربانیاں دی گئیں۔

انہوں نے کہا کہ برطانوی فوج صرف وردی پہننے والے اہلکاروں کی نہیں بلکہ ملک میں آباد تمام برادریوں کی فوج ہے۔ برطانوی فوج اور جنوبی ایشیائی باشندوں کی تاریخ اور ورثہ ایک دوسرے سے گہرا تعلق رکھتے ہیں۔ان کے دورے کا مقصد برطانوی فوج اور جنوبی ایشیائی برادریوں کے درمیان تاریخی تعلقات کو مضبوط بنانا اور مشترکہ فوجی ورثے کو اجاگر کرنا ہے۔