پختونخوا میں بروقت گورنر راج نہ لگاتے تو صوبے کو مزید نقصان پہنچ سکتا تھا، وزیراعظم

اسلام آباد (قومی بیورو): وزیراعظم شہباز شریف نے کہا ہے کہ پختونخوا میں بروقت گورنر راج نہ لگاتے تو صوبے کو مزید نقصان پہنچ سکتا تھا۔

مسلم لیگ ن خیبر پختونخوا کی پارلیمانی پارٹی اور عہدیداوں سے خطاب کرتے ہوئے شہباز شریف نے کہا کہ بطوروزیراعظم پاکستان اور قائد محمد نواز شریف کے کارکن کی حیثیت سے آپ سے مخاطب ہوں۔ خیبر پختونخوا وطن عزیز کا خوبصورت صوبہ اوریہاں کے عوام غیور، دلیر اور باوقار ہیں ۔ مسلم لیگ ن نے خیبر پختونخوا میں جمہوری روایات کے فروغ کے لیے اہم کردار ادا کیا۔

انہوں نے کہا کہ 2013 کے انتخابات کے بعدقائدنواز شریف نے صوبے میں اکثریتی جماعت کو حکومت بنانے کا موقع دیا۔ نواز شریف کی جمہوری سوچ اور فراخ دلی نے خیبر پختونخوا میں جمہوریت کو آگے بڑھنے کا موقع دیا۔ خیبر پختونخوا میں 13 سال برسراقتدار پارٹی کی طرف سے بلند بانگ دعوے کیے گئے۔ گزشتہ 13سال میں صوبے میں کتنی یونیورسٹیاں اور اسپتال بنائے گئے؟

شہباز شریف کا کہنا تھا کہ عوامی خدمت کے بجائے سیاسی نعروں اور تقسیم در تقسیم پر توجہ دی گئی۔ پشاور سے کوہستان، ہزارہ اور جنوبی اضلاع تک عوامی مسائل عدم توجہی کا شکار رہے ۔ ملک سے دہشت گردی کے خاتمے میں خیبر پختونخوا کے عوام نے عظیم قربانیاں دیں۔ عوام، پولیس، فوج اور سیاسی رہنماؤں نے دہشت گردی کے خلاف بے مثال قربانیاں دیں۔

وزیراعظم کا کہنا تھا کہ دہشت گردی کے خلاف جنگ میں خیبر پختونخوا کے عوام کی قربانیوں کو فراموش نہیں کیا جا سکتا۔ گزشتہ ڈھائی سال میں ملک میں لانگ مارچ اور دھرنوں کی سیاست کی گئی۔ 2014 کے دھرنے کے باعث چینی صدر کا دورۂ پاکستان مؤخر ہوا ۔ 2015 میں صدر شی جن پنگ کے دورۂ پاکستان میں اہم معاہدوں پر دستخط کیے گئے۔