کراچی: نامعلوم ملزمان کی فائرنگ سے ماں بیٹی قتل، بیٹا زخمی، واقعے کی فوٹیج سامنے آگئی

کراچی کے علاقے گلشنِ حدید میں نامعلوم مسلح ملزمان نے گھر میں گھس کر اندھا دھند فائرنگ کر دی، جس کے نتیجے میں ماں اور بیٹی موقع پر ہی جاں بحق جبکہ ان کا بیٹا شدید زخمی ہو گیا۔ واقعہ کے بعد ملزمان موقع سے فرار ہونے میں کامیاب ہو گئے۔

ریسکیو ذرائع کے مطابق فائرنگ کا نشانہ بننے والی خواتین کی لاشیں فوری طور پر اسپتال منتقل کر دی گئی ہیں، جبکہ فائرنگ سے زخمی ہونے والے بیٹے کو بھی طبی امداد کے لیے اسپتال پہنچایا گیا جہاں ڈاکٹرز کے مطابق اس کی حالت خطرے سے باہر ہے۔

دریں اثنا، اس دلخراش واقعے کی سی سی ٹی وی فوٹیج بھی سامنے آ گئی ہے۔ فوٹیج میں گھر کے اندر فائرنگ اور خواتین کی خوف سے چلانے کی آوازیں واضح طور پر سنی جا سکتی ہیں۔

فوٹیج کے مطابق فائرنگ کے بعد ایک ملزم کو اطمینان سے موٹر سائیکل پر فرار ہوتے ہوئے بھی دیکھا جا سکتا ہے۔ اندوہناک واقعے کی فائرنگ کی آوازیں سن کر خوفزدہ علاقہ مکین بڑی تعداد میں گلی میں باہر نکل آئے، جبکہ پولیس نے واقعے کی تحقیقات شروع کر دی ہیں۔