کویت میں جی سی سی کی نئی فوجی کمانڈ، کیا ایران کے خلاف خلیجی دفاع مضبوط بنا سکے گی؟

دی اردو پوسٹ (مانیٹرنگ ڈیسک): خلیج تعاون کونسل (جی سی سی) نے کویت میں مشترکہ فارورڈ ملٹری کمانڈ قائم کرنے کی منظوری دے دی ہے۔ کویت ایران کے حملوں سے سب سے زیادہ متاثر ہونے والا رکن ملک ہے۔ یہ فیصلہ اجتماعی دفاع کے وعدوں کو عملی فوجی صلاحیت میں تبدیل کرنے کی سمت کونسل کا اب تک کا سب سے اہم اور ٹھوس قدم قرار دیا جا رہا ہے۔

جی سی سی کے سیکریٹری جنرل جاسم محمد البدیوی نے منگل کو جاری ایک بیان میں کہا کہ نئی کمانڈ کے تحت رکن ممالک کی مسلح افواج کے دستے تعینات کیے جائیں گے۔

یہ اعلان بحرین کے دارالحکومت منامہ میں جی سی سی کی مشترکہ دفاعی کونسل کے 23ویں اجلاس کے بعد کیا گیا، جس میں رکن ممالک بحرین، کویت، عمان، قطر، سعودی عرب اور متحدہ عرب امارات کے وزرائے دفاع نے شرکت۔

جاسم محمد البدیوی نے کہا کہ خلیج تعاون کونسل کی مشترکہ فوجی کارروائی کو رکن ممالک کے سربراہان کی جانب سے خصوصی اہمیت، توجہ اور حمایت حاصل ہے۔

ان کے مطابق یہ حمایت اس امر کی عکاسی کرتی ہے کہ خلیجی رہنما اپنے ممالک کی مسلح افواج کی اس ذمہ داری سے بخوبی آگاہ ہیں کہ وہ اپنے ملکوں کی سلامتی اور استحکام یقینی بنائیں، خودمختاری کا تحفظ کریں اور اپنی صلاحیتوں کو جدید تقاضوں اور ان سے وابستہ توقعات کے مطابق بہتر بنائیں۔

انہوں نے کہا کہ اجلاس کے ایجنڈے میں کئی اہم فیصلے شامل تھے، جن کا مقصد خلیجی ممالک کے درمیان مشترکہ فوجی تعاون کو مزید وسعت دینا اور انضمام کے نئے امکانات پیدا کرنا ہے۔

تاہم انہوں نے نئی فارورڈ کمانڈ کی ذمہ داریوں، عملی دائرہ کار یا اس کے تحت تعینات کیے جانے والے فوجیوں کی تعداد کی وضاحت نہیں۔

ایران کے ’غدارانہ حملوں‘ کا جواب دینا مشترکہ خلیجی ذمہ داری قرار دیتے ہوئے البدیوی نے کہا کہ رکن ممالک کی سرزمین، وسائل اور شہریوں کے تحفظ کے لیے ان کی فوجی کوششوں میں ہم آہنگی ناگزیر ہے۔

تجزیہ کاروں کے مطابق یہ اقدام ایران اور اس کے اتحادی مسلح گروہوں کے حملوں کا براہ راست جواب ہے، جنہوں نے انفرادی طور پر ہر ملک کی دفاعی کارروائیوں کی محدود صلاحیت اور خلیجی تعاون کونسل کی سطح پر مربوط دفاعی نظام کی عدم موجودگی کو نمایاں کیا ہے۔

خلیج ریسرچ سینٹر کے بانی اور چیئرمین ڈاکٹر عبدالعزیز صقر نے عرب نیوز سے گفتگو کرتے ہوئے کہا کہ یہ فیصلہ ایرانی میزائل اور ڈرون حملوں، عراق سے سرگرم مسلح دھڑوں کے حملوں اور سعودی عرب پر حوثیوں کے حملوں کے تناظر میں مشترکہ دفاعی صلاحیت مضبوط بنانے کی خلیجی کوششوں کی عکاسی کرتا ہے۔

ان کے مطابق جی سی سی کو بیک وقت کئی خطرات اور مختلف سمتوں سے آنے والے حملوں کا سامنا ہے، جس کے پیش نظر مشترکہ منصوبہ بندی، دفاعی صلاحیتوں میں ہم آہنگی اور ایک دوسرے کی مدد کا مؤثر نظام ضروری ہو گیا ہے۔

انہوں نے کہا کہ خلیجی تعاون کونسل کو خطے کی سلامتی کو ناقابل تقسیم قرار دینے کے اپنے سیاسی عزم کو قابل عمل فوجی صلاحیت میں تبدیل کرنا ہوگا۔

ڈاکٹر صقر کے مطابق خلیج کے شمالی سرے پر واقع ہونے کے باعث کویت اجتماعی دفاع کے لیے ایک قدرتی اگلے مورچے کے طور پر موزوں ہے۔

فروری میں ایران کے خلاف امریکہ اور اسرائیل کی جنگ شروع ہونے کے بعد سے کویت خلیج تعاون کونسل کا وہ رکن ملک ہے جسے سب سے زیادہ حملوں کا سامنا کرنا پڑا۔ اس پر ایران اور عراق دونوں سمتوں سے حملے کیے گئے۔

آرمڈ کنفلکٹ لوکیشن اینڈ ایونٹ ڈیٹا پروجیکٹ (اے سی ایل ای ڈی) کے مطابق خلیج تعاون کونسل کے رکن ممالک میں غیر فوجی تنصیبات پر ریکارڈ کیے گئے ہر چار حملوں میں سے ایک کویت میں ہوا۔ ان حملوں کے اہداف میں کویت انٹرنیشنل ایئرپورٹ، تیل صاف کرنے کے کارخانے (ریفائنریز) اور شعیبہ بجلی گھر و پانی صاف کرنے کا پلانٹ شامل ہیں۔

کویت فضائیہ کے سابق لڑاکا طیاروں کے پائلٹ اور ریٹائرڈ میجر جنرل ظافر العجمی نے عرب نیوز سے گفتگو کرتے ہوئے کہا کہ کویت میں فارورڈ کمانڈ کا قیام خلیجی ممالک کے درمیان فوجی تعاون مضبوط بنانے کی جانب ایک اور اہم قدم ہے۔

ان کے مطابق یہ کمانڈ ریاض میں قائم متحدہ فوجی کمانڈ کا متبادل نہیں بلکہ اس کی تکمیل کرے گی۔ اس سے جی سی سی کی افواج کے درمیان رابطہ کاری، مشترکہ منصوبہ بندی اور جنگی تیاری بہتر بنانے میں بھی مدد مل سکتی ہے، جبکہ اس کی بنیاد رکن ممالک کے درمیان پہلے سے موجود فوجی تعاون پر ہوگی۔

جی سی سی کی متحدہ فوجی کمانڈ 2013 میں مشترکہ فوجی کارروائیوں میں رابطہ کاری اور اجتماعی دفاع مضبوط بنانے کے لیے قائم کی گئی تھی۔ اس کا مرکزی ہیڈکوارٹر 2021 میں ریاض میں قائم کیا گیا۔

کونسل کی دیرینہ مشترکہ فوجی فورس ’پیننسولا شیلڈ‘ 1980 کی دہائی کے وسط سے موجود ہے۔ اس فورس میں تقریباً 40 ہزار اہلکار شامل ہیں، جنہیں دو بریگیڈز میں منظم کیا گیا ہے۔

ماہرین کے مطابق کویت میں نئی کمانڈ کے قیام کی اہمیت اس بات میں ہے کہ اس سے خلیج کے شمالی حصے میں زیادہ مربوط فوجی موجودگی قائم ہوگی، جہاں ایران اور عراق میں سرگرم مسلح گروہوں سے لاحق خطرات مسلسل بڑھ رہے ہیں۔

دوحہ میں قائم مڈل ایسٹ کونسل آن گلوبل افیئرز کے سینئر نان ریزیڈنٹ فیلو مہند سلوم نے عرب نیوز سے گفتگو کرتے ہوئے کہا کہ یہ کوئی نیا فوجی ادارہ نہیں ہے۔ متحدہ فوجی کمانڈ کی منظوری 2013 میں دی گئی تھی اور اس کا مرکزی دفتر 2021 میں ریاض میں کھولا گیا جبکہ پیننسولا شیلڈ اس کے زمینی فوجی حصے کے طور پر کام کرتی ہے۔

انہوں نے کہا کہ کویت میں نئی کمانڈ کے قیام سے جو اہم تبدیلی آئے گی، وہ خلیج کے شمالی سرے پر مستقل فوجی موجودگی اور پہلے سے مختص افواج کی تعیناتی ہے۔

ان کے مطابق اس انتظام کے تحت ایران اور جنوبی عراق سے داغے جانے والے میزائلوں اور دیگر حملوں کی پیشگی اطلاع ملنے، خلیج کے شمالی حصے سے متعلق مشترکہ انٹیلی جنس معلومات حاصل کرنے اور تمام رکن ممالک کے دارالحکومتوں سے تعیناتی کی منظوری کا انتظار کیے بغیر فوجی دستوں کو احکامات دینے میں مدد مل سکتی ہے۔

ڈاکٹر عبدالعزیز صقر کے نزدیک کویت میں کمانڈ کا قیام ایک دیرینہ ادارہ جاتی ڈھانچے کو حقیقی اور فعال فوجی صلاحیت میں تبدیل کرنے کا موقع فراہم کرتا ہے۔ ان کے بقول حالیہ مہینوں میں اس تبدیلی کی ضرورت پہلے سے کہیں زیادہ بڑھ گئی ہے۔

انہوں نے کہا کہ یہ اقدام حقیقی مشترکہ فوجی صلاحیت کو دوبارہ فعال بنانے کی کوشش ہے۔ کئی برسوں سے خلیجی ممالک کا اجتماعی دفاع زیادہ تر ایک ادارہ جاتی خاکے تک محدود رہا ہے۔ ادارے تو موجود تھے لیکن میدان میں مستقل طور پر تعینات کوئی مشترکہ فوجی فورس نہیں تھی۔

ان کے مطابق مجوزہ انتظام کے تحت ہر رکن ملک اپنی مسلح افواج سے ایک مخصوص فوجی یونٹ نئی کمانڈ کے لیے مختص کرے گا۔

انہوں نے کہا کہ اس منصوبے کا بنیادی مقصد واضح ہے: خلیجی تعاون کونسل کے مشترکہ دفاع کے اصول کو ایک فعال اور عملی حقیقت میں تبدیل کرنا۔

ان کے بقول اس فیصلے کی فوری اہمیت اجتماعی دفاع کی ساکھ مضبوط بنانے اور اس کی ذمہ داریاں مشترکہ طور پر اٹھانے کے لیے آمادگی ظاہر کرنے میں ہے، جبکہ طویل مدت میں اس کا مقصد ایک پائیدار مشترکہ دفاعی صلاحیت تشکیل دینا ہے، جس کے لیے واضح کمانڈ سسٹم، افواج کی جنگی تیاری، انٹیلی جنس معلومات کا انضمام اور مؤثر فیصلہ سازی ضروری ہے۔

امریکہ اور ایران کے درمیان کشیدگی کا تناظر۔

یہ اعلان ایسے وقت میں سامنے آیا ہے جب امریکی صدر ڈونلڈ ٹرمپ نے دعویٰ کیا ہے کہ ’فوجی اعتبار سے ایران کا عملاً خاتمہ ہو چکا ہے۔‘ انہوں نے امریکہ کی جانب سے مزید بڑے حملوں کے امکان سے متعلق قیاس آرائیوں کو مسترد کرتے ہوئے خبردار کیا کہ اگر حالات تبدیل ہوئے تو واشنگٹن ہر طرح کی کارروائی کے لیے تیار ہے۔

ایرانی حکام اس تنازع کے ممکنہ خاتمے سے متعلق ٹرمپ کے سابقہ بیانات پر بارہا شکوک و شبہات کا اظہار کر چکے ہیں۔

مہند سلوم کے مطابق نئی کمانڈ کے قیام کا وقت اس امکان کی عکاسی کرتا ہے کہ یہ تنازع کسی سیاسی سمجھوتے کے بغیر طویل عرصے تک جاری رہ سکتا ہے۔ اسی لیے خلیجی حکومتیں ایسی طویل صورت حال کے لیے اپنی تیاری کر رہی ہیں جس میں نہ مکمل جنگ ہو اور نہ امن قائم ہو۔

انہوں نے کہا کہ اس فیصلے کے پیچھے تزویراتی ضرورت کے ساتھ ادارہ جاتی عمل بھی کارفرما ہے۔ اپریل میں جدہ میں خلیجی رہنماؤں نے دفاعی تعاون کو مزید مربوط بنانے کی ہدایات دی تھیں، 29 اکتوبر کو مسلح افواج کے سربراہان کا اجلاس ہوا اور اب وزرائے دفاع نے اس منصوبے کی منظوری دے دی ہے۔

انہوں نے خبردار کیا کہ نئی کمانڈ کو تہران کے خلاف اشتعال انگیز اقدام کے طور پر نہیں دیکھنا چاہیے۔

ان کے مطابق ایسے رکن ملک میں کمانڈ پوسٹ قائم کرنا جس پر دو سمتوں سے حملے ہوئے ہوں، ایک دفاعی اقدام ہے، بشرطیکہ اس کے لیے مختص افواج فضائی دفاع، پیشگی اطلاع اور نگرانی کی ذمہ داریاں انجام دیں، نہ کہ حملہ کرنے والے دستوں پر مشتمل ہوں۔

انہوں نے کہا کہ عراق کے معاملے میں اس اقدام کا پیغام وہاں سرگرم مسلح دھڑوں کے لیے ہے، نہ کہ عراقی ریاست کے لیے۔ اسی طرح اسرائیل شمالی خلیج کی کمانڈ کے لیے بنیادی خطرہ نہیں ہے، تاہم 2025 میں دوحہ پر اسرائیلی حملہ ان وجوہات میں شامل ہے جن کے باعث خلیجی ممالک اب ایک سے زیادہ سمتوں سے لاحق خطرات کو مدنظر رکھتے ہوئے دفاعی منصوبہ بندی کر رہے ہیں۔

ظافر العجمی نے کہا کہ حالیہ تنازعات نے خلیجی ممالک کے درمیان قریبی فوجی تعاون کی ضرورت واضح کر دی ہے۔ ان کے مطابق اس اقدام کا مقصد پہلے سے موجود دفاعی انتظامات کو ختم کرنا نہیں بلکہ انہیں مزید مضبوط بنانا ہے۔

انہوں نے کہا کہ ان کے نزدیک یہ علاقائی استحکام مضبوط بنانے کے لیے ایک دفاعی اقدام ہے، جس کا مقصد کشیدگی میں اضافہ کرنا نہیں۔

انہوں نے مزید کہا کہ وہ اسے امریکا کے ساتھ موجودہ دفاعی شراکت داری سے دوری کے طور پر نہیں دیکھتے۔ اس کا مقصد بین الاقوامی دفاعی شراکت داری برقرار رکھتے ہوئے خلیجی ممالک کے اجتماعی دفاع اور فوجی تعاون کو مضبوط بنانا ہے۔

یہ فیصلہ ایسے وقت میں بھی سامنے آیا ہے جب خطے میں علاقائی اور بین الاقوامی دفاعی معاہدوں کا دائرہ وسیع ہو رہا ہے۔ ان میں سعودی عرب، پاکستان اور ترکیے کے درمیان حال ہی میں طے پانے والا مکہ معاہدہ اور خلیجی ممالک کے برطانیہ اور فرانس جیسے شراکت داروں کے ساتھ دوطرفہ دفاعی معاہدے شامل ہیں۔

ظافر العجمی نے کہا کہ مکہ معاہدہ اور جی سی سی کی متحدہ فوجی کمانڈ دو مختلف دفاعی انتظامات ہیں، جن کا اپنا الگ ڈھانچہ اور ذمہ داریاں ہیں۔ ان کے نزدیک ضروری نہیں کہ یہ ایک دوسرے سے متصادم ہوں یا ان کے درمیان مقابلے کی صورت حال پیدا ہو۔

مہند سلوم نے تسلیم کیا کہ مختلف دفاعی اداروں اور معاہدوں کی موجودگی سے ادارہ جاتی سطح پر پیچیدگیاں پیدا ہونے کا خدشہ ہے، تاہم ان کے مطابق ان تمام انتظامات کے مقاصد الگ الگ ہیں۔

انہوں نے کہا کہ جی سی سی کی کمانڈ واحد ایسا ڈھانچہ ہے جو چھوں رکن ممالک کو ایک دوسرے کے ساتھ مربوط کرتا ہے۔ مسئلہ اس وقت پیدا ہوتا ہے جب کسی بحران کے دوران ہر ملک اپنی مدد کے لیے سب سے پہلے اپنے بیرونی اتحادی سے رابطہ کرے۔

ان کے مطابق رواں سال بھی تقریباً یہی صورت حال دیکھنے میں آئی۔ ایک رکن ملک پر حملے کو تمام رکن ممالک پر حملہ تصور کرنے کے اصول کی توثیق تو کی گئی، لیکن عملی ردعمل انفرادی ممالک کی سطح پر سامنے آیا۔ متحدہ عرب امارات کے سابق وزیر مملکت برائے امور خارجہ انور قرقاش نے بھی رواں ماہ اس صورت حال کا اعتراف کیا تھا۔

مہند سلوم نے کہا کہ متعدد وجوہات کے باعث اجتماعی فوجی کارروائی کا تصور عملی شکل اختیار نہیں کر سکا، جن میں ان کے بقول امریکیوں کے ذریعے رابطہ کاری کرنے کی دیرینہ عادت بھی شامل ہے۔

انہوں نے کہا کہ اب جس تبدیلی کی ضرورت ہے وہ بظاہر محدود لیکن مشکل ہے۔ اس کے لیے مشترکہ انٹیلی جنس نظام، فضائی صورت حال سے متعلق یکساں معلومات اور پہلے سے طے شدہ قواعد درکار ہیں تاکہ فوجی کمانڈرز دفاعی کارروائی کے لیے چھ رکن ممالک کے دارالحکومتوں کا اجلاس بلائے بغیر فیصلہ کر سکیں۔

کیا خلیجی ممالک کی مشترکہ فوج بن سکے گی؟

نئی کمانڈ کے اعلان کے بعد خلیجی ممالک کی ایک متحدہ فوج تشکیل دینے کے امکان پر بھی بحث دوبارہ شروع ہو گئی ہے۔ تاہم مہند سلوم نے خبردار کیا کہ اسے پیش رفت کا پیمانہ بنانا درست نہیں ہوگا، کیونکہ سیاسی اور تزویراتی اختلافات ماضی میں بھی فوجی انضمام کی کوششوں میں رکاوٹ بنتے رہے ہیں۔

انہوں نے کہا کہ جی سی سی اس سے پہلے بھی ایسی کوششیں کر چکی ہے۔ پیننسولا شیلڈ فورس 1980 کی دہائی سے موجود ہے، 2013 میں ایک لاکھ اہلکاروں پر مشتمل مشترکہ فوج بنانے کا اعلان کیا گیا تھا، جبکہ اسی سال منظور ہونے والی متحدہ فوجی کمانڈ کا ہیڈکوارٹر کھلنے میں 2021 تک کا وقت لگ گیا۔

ان کے مطابق اس راہ میں اصل رکاوٹیں سیاسی ہیں۔ کوئی بھی خلیجی ملک جنگ شروع کرنے کا فیصلہ کسی ایسی مشترکہ کمانڈ کے حوالے نہیں کرے گا جو قومی حکومتوں سے بالاتر ہو۔

انہوں نے کہا کہ زیادہ حقیقت پسندانہ ماڈل ایک متحدہ فوج کے بجائے نیٹو (شمالی اوقیانوس کا معاہدہ) جیسا ہو سکتا ہے۔

مہند سلوم کے مطابق کویت میں کمانڈ کا قیام ایک بامعنی پیش رفت تب ثابت ہوگا جب اس کے بعد تین اقدامات کیے جائیں: تمام چھوں رکن ممالک اپنی افواج کے دستے فراہم کریں، نئی کمانڈ کو ان دستوں پر حقیقی اختیارات حاصل ہوں اور تمام ممالک کے درمیان مشترکہ انٹیلی جنس معلومات کا نظام قائم ہو۔