ایران کی مدد کرنے پر بھارتی اور ترک کمپنیوں پر امریکی پابندیاں

دی اردو پوسٹ (مانیٹرنگ ڈیسک): گوگل پر ڈی ڈبلیو کو ترجیح دیں امریکی محکمہ خزانہ نے اپنے بیان میں کہا کہ یہ پابندیاں اس لیے عائد کی گئی ہیں کہ ان افراد اور اداروں نے ایک ''وسیع مجرمانہ نیٹ ورک‘‘ قائم کر رکھا تھا۔

یہ پابندیاں ٹرمپ انتظامیہ کے ''آپریشن اکنامک آؤٹ کاسٹ‘‘ کا حصہ ہیں، جس کا مقصد ایران کی اپنا تیل فروخت کرنے اور امریکہ و اسرائیل کے ساتھ جنگ کے لیے مالی وسائل فراہم کرنے کی صلاحیت کو محدود کرنا ہے۔

محکمہ خزانہ نے یہ نئی پابندیاں امریکی مڈ ٹرم الیکشن کے نتائج سامنے آنے کے ایک روز بعد جاری کیں۔ ان انتخابات میں ڈیموکریٹس نے بڑی کامیابی حاصل کرتے ہوئے کانگریس کے دونوں ایوانوں کا کنٹرول حاصل کر لیا۔ ووٹرز نے ایران جنگ اور امریکہ میں مہنگائی بڑھانے پر اس جنگ کے اثرات کے خلاف غصے کا اظہار کیا تھا۔

محکمہ خزانہ نے گزشتہ ہفتے کہا تھا کہ اس کی کارروائیاں ایران کی معیشت کو شدید نقصان پہنچا رہی ہیں، جس کے باعث ایرانی کرنسی کی قدر ریکارڈ حد تک کم سطح پر پہنچ گئی ہے اور ایران میں افراط زر تقریباً 90 فیصد تک بڑھ گیا ہے۔

امریکی محکمہ خزانہ کے مطابق بدھ کی کارروائی میں بھارت میں مقیم سنیل کمار شرما، ان کی اہلیہ جسپریت پریتی شاہد، ان کے کاروبار سے وابستہ دو دیگر بھارتی شہریوں اور شرما سے منسلک نو اداروں کو نشانہ بنایا گیا۔

محکمہ خزانہ نے اپنے بیان میں کہا کہ ان افراد اور اداروں نے ایک ''وسیع مجرمانہ نیٹ ورک‘‘ قائم کر رکھا تھا۔

بیان کے مطابق، ''ان کے طریقہ کار نے پابندیوں کی زد میں آنے والے ایسے بحری جہازوں کو جعلی پرچم اور سرٹیفیکیٹ فراہم کیے، جو ایرانی پٹرولیم کی نقل و حمل میں ملوث تھے، جن میں ایرانی فوج اور اس کے اتحادیوں کی جانب سے استعمال ہونے والے جہاز بھی شامل تھے۔‘‘۔

جعلی پرچم اور سمندری سرٹیفیکیٹ غیر قانونی سرگرمیوں میں ملوث جہازوں کو بین الاقوامی حفاظتی اور ماحولیاتی ضوابط سے بچنے میں مدد دیتے ہیں۔ لیکن ایسے جہازوں کے پاس نقصانات کی تلافی کے لیے بیمہ موجود نہیں ہوتا۔

اس کا مطلب یہ ہے کہ اگر یہ جہاز کسی ملک کی سمندری حدود میں حادثے کا شکار ہوں، تو متعلقہ ملک کی معیشت کو اربوں ڈالر کا نقصان پہنچ سکتا ہے۔

امریکی محکمہ خزانہ کے دفتر برائے غیر ملکی اثاثہ جات کنٹرول (او ایف اے سی) کے مطابق بھارت کے شہر چندی گڑھ میں مقیم سنیل کمار شرما اور جسپریت پریتی شاہد نے گیانا، ایسواتینی اور لاؤس سمیت مختلف ممالک کی نمائندگی کرنے کا جھوٹا دعویٰ کرتے ہوئے بحری جہازوں کے لیے پرچم اور سرٹیفیکیٹ جاری کیے۔

اس عمل کے ذریعے ایرانی فوج اور اس کے اتحادیوں کی جانب سے استعمال ہونے والے جہازوں کو بین الاقوامی پابندیوں سے بچنے اور اپنی سرگرمیاں جاری رکھنے میں مدد ملی۔

شرما کے نیٹ ورک نے انٹرنیٹ ڈومینز خرید کر ویب سائٹس قائم کیں، جن پر دعویٰ کیا جاتا تھا کہ وہ ان ممالک کی جانب سے بحری جہازوں کو پرچم فراہم کرنے، سمندری عملے کی تربیت اور سرٹیفیکیٹ جاری کرنے، اور جہازوں کی درجہ بندی جیسی خدمات انجام دیتے ہیں۔

شرما اور ان کی اہلیہ نے بھارت میں قائم اداروں کے ایک نیٹ ورک کا بھی انتظام کیا، جسے جعلی بحری پرچم رجسٹریاں قائم کرنے کے لیے استعمال کیا گیا۔ ان اداروں کو بھی پابندیوں کی فہرست میں شامل کر دیا گیا ہے۔

امریکی محکمہ خزانہ کے مطابق ترکی کی فوگو گراؤنڈ سروسز کمپنی نے ایران کی متعدد امریکی پابندیوں کا شکار فضائی کمپنیوں کو زمینی خدمات اور دیگر سہولتیں فراہم کیں، جو بدستور ترکی کے لیے پروازیں چلا رہی تھیں۔

ان کمپنیوں میں ایران ایئر ٹور، ساہا ایئرلائنز، تابان ایئرلائنز اور عطا ایئرلائنز شامل ہیں۔

محکمہ خزانہ کے مطابق یہ کمپنی ایران کے شدید پابندیوں کا شکار فضائی شعبے کی مسلسل معاونت کر رہی تھی۔

امریکی وزیر خزانہ اسکاٹ بیسنٹ نے کہا کہ امریکی حکومت تہران کی حمایت کرنے والوں کے خلاف کارروائی جاری رکھے گی۔

انہوں نے کہا، ''ہم جانتے ہیں کہ آپ کہاں ہیں، اور جو لوگ ایرانی حکومت کی حمایت جاری رکھیں گے، ہم ان پر پابندیاں عائد کریں گے، چاہے وہ زمینی، سمندری یا فضائی راستے سے ایسا کریں۔‘‘۔

ان پابندیوں کے تحت نامزد افراد کے امریکہ سے منسلک اثاثے منجمد کر دیے جاتے ہیں، ان کے ساتھ زیادہ تر کاروباری لین دین پر پابندی عائد ہوتی ہے اور یہ پابندیاں ان کمپنیوں پر بھی لاگو ہوتی ہیں جن میں نامزد افراد کی کم از کم 50 فیصد ملکیت ہو۔

امریکی اداروں کے علاوہ غیر ملکی کمپنیوں اور بینکوں کو بھی ان پابندیوں سے بچنے یا ان کی خلاف ورزی میں مدد دینے پر جرمانوں اور دیگر کارروائیوں کا سامنا کرنا پڑ سکتا ہے۔

بھارت نے تاحال نئی پابندیوں پر کوئی تبصرہ نہیں کیا۔ بھارتی وزارت خارجہ نے روئٹرز کی جانب سے تبصرے کے لیے بھیجی گئی درخواست کا کوئی جواب نہیں دیا۔