ایل پی جی کی بلا تعطل فراہمی کیلیے امپورٹرز نے حکومت سے سکیورٹی مانگ لی

لاہور (بیورو رپورٹ): ایل پی جی کی بلا تعطل فراہمی کو یقینی بنانے اور سنگین بحران سے بچنے کے لیے ایل پی جی امپورٹرز نے سکیورٹی مانگ لی، امپورٹرز نے کہا ہے کہ ایران کے تین بارڈرز بند ہیں جبکہ سکیورٹی ناقص ہے جس کے سبب ایل پی جی باوزر کی ٹرانسپورٹیشن میں مسائل کا سامنا۔

ایل پی جی امپورٹرز ایسوسی ایشن کے چیئرمین شیخ مکرم وحید نے سیکرٹری وزارت پٹرولیم اور ڈی جی نیشنل لاجسٹک کارپوریشن راولپنڈی کو خط لکھا ہے جس میں سے ہنگامی مدد کی اپیل کی۔

خط میں کہا گیا ہے کہ ایران سے منسلک 3 بڑے بارڈر گبد، مند اور چاغی / ماشخیل کمرشل آمدورفت کے لیے بند کر دیے گئے ہیں۔ اس وقت صرف تفتان بارڈر آپریشنل ہے جبکہ بلوچستان میں امن و امان کی خراب صورتحال کی وجہ سے تفتان سے پنجاب تک گاڑیوں کی نقل و حرکت شدید متاثر ہے ایل پی جی لانے والی جو گاڑیاں عام طور پر 3 سے 4 دن میں پنجاب پہنچ جاتی تھیں، اب خراب کانوائے سسٹم، بار بار روکے جانے اور سیکیورٹی نہ ہونے کی وجہ سے 10 دن سے زیادہ لے رہی ہیں۔