اینکر ربیعہ احسن کیس میں پیش رفت، ملزم شوہر پولی گرافک ٹیسٹ کے لیے لاہور روانہ

لاہور (بیورو رپورٹ): ٹی وی اینکر پرسن ربیعہ احسن کی موت کے کیس کی تفتیش میں پیش رفت سامنے آئی ہے اور پولیس ملزم احسن کو پولی گرافک ٹیسٹ کے لیے لاہور لے کر روانہ ہو گئی ہے۔

تفتیشی ذرائع کے مطابق بدھ کو پولیس کی خصوصی ٹیم جائے وقوعہ اور پوسٹ مارٹم کے دوران حاصل کیے گئے سیمپلز کے پارسل بھی اپنے ساتھ لاہور لے کر گئی ہے، جنہیں تجزیے کے لیے پنجاب فارنزک سائنس ایجنسی جمع کروایا جائے گا۔

یہ بھی بتایا گیا ہے کہ لاہور میں ملزم احسن کا ڈی این اے ٹیسٹ بھی کروایا جائے گا۔

دوسری جانب پولیس نے مقتولہ اینکر پرسن ربیعہ احسن کے زیرِ استعمال تینوں موبائل فونز کا مکمل فارنزک کروانے کا بھی فیصلہ کیا ہے۔

تفتیشی ذرائع کا یہ بھی کہنا ہے کہ مقتولہ کے تینوں موبائل فونز پر کسی قسم کا پاس ورڈ یا سکیورٹی کوڈ نہیں لگا تھا اور پولیس کی جانب سے ان فونز کا ابتدائی تجزیہ مکمل کر لیا گیا ہے اور ربیعہ احسن اور ان کے شوہر کے درمیان ہونے والی چیٹ بھی حاصل کر لی گئی ہے۔

یہ بھی بتایا گیا ہے کہ میاں بیوی کے مابین ہونے والی گفتگو سے کسی قسم کے تنازع یا کشیدگی کا عنصر سامنے نہیں آیا۔

پولیس کو بھی معلوم ہوا ہے کہ ربیعہ احسن پیشے کے اعتبار سے بطور صحافی اہم سیاسی و سرکاری شخصیات سے رابطے میں تھیں اور ان کے موبائل فون سے ایک وفاقی وزیر کے ساتھ ہونے والی رابطہ چیٹ بھی پولیس نے حاصل کر لی ہے۔

تفتیشی حکام کا یہ بھی کہنا ہے کہ ابتدائی تجزیے سے فی الوقت کسی تنازع کے ثبوت حاصل نہیں ہوئے ہیں، تاہم تینوں موبائل فونز کی حتمی فارنزک رپورٹ موصول ہونے کے بعد اسے کیس کے چالان کا حصہ بنایا جائے گا۔

خیال رہے آٹھ نومبر کو راولپنڈی میں اپنے گھر کے اندر ربیعہ احسن گولی لگنے سے چل بسی تھیں، بعدازاں ان کے شوہر احسن کو پولیس نے گرفتار کیا تھا جنہوں نے پولیس کو بتایا تھا کہ ان سے غلطی سے گولی چل گئی تھی۔

راولپنڈی کے تھانہ صدر بیرونی میں آٹھ نومبر کو درج ہونے والی ایف آئی آر کے مطابق متوفیہ کے بھائی اور مدعی مقدمہ خرم احمد نے پولیس کو بتایا تھا کہ انہیں فون پر اطلاع دی گئی تھی کہ ربیعہ احسن کو اُن کے شوہر نے گولی مار دی ہے۔

مدعی کے بیان کے مطابق جب وہ موقع پر پہنچے تو ان کی بہن خون میں لَت پَت پڑی تھیں اور فوت ہو چکی تھیں جبکہ اُن کے شوہر کے ہاتھ میں پستول تھا۔