ایران پر ممکنہ نئے حملوں کے لیے امریکی بیڑے یو ایس ایس جارج واشنگٹن پر تیاریاں

بین الاقوامی ڈیسک (واشنگٹن / لندن): واشنگٹن: امریکا ایران کے خلاف ممکنہ طور پر دوبارہ فوجی کارروائی کی تیاری کر رہا ہے، اس سلسلے میں امریکی جنگی بحری بیڑے یو ایس ایس جارج واشنگٹن پر تیاریاں جاری ہیں۔

وال اسٹریٹ جرنل نے ہفتے کے روز رپورٹ کیا کہ امریکی بحریہ کے اہلکار جنگی جہازوں پر گولہ بارود لوڈ کر رہے ہیں اور طیاروں کو کارروائی کے لیے تیار کر رہے ہیں۔ ان جہازوں میں طیارہ بردار بحری جہاز یو ایس ایس جارج واشنگٹن کے جنگی بحری گروپ کے جہاز بھی شامل ہیں۔

یہ تیاریاں ایسے وقت میں ہو رہی ہیں جب امریکی انٹیلی جنس خبردار کر رہی ہے کہ امریکی شہریوں کو نشانہ بنانے کی ایرانی منصوبہ بندی عروج پر ہے۔ ایکسیوس، سی این این اور این بی سی نیوز کی رپورٹس کے مطابق، صدر ڈونلڈ ٹرمپ بھی تہران کے خلاف ایک اور فوجی کارروائی کے امکان کا کھلے عام اظہار کیا ہے۔چکے ہیں۔

واشنگٹن نے مشرقِ وسطیٰ کے بعض حصوں میں اپنی سفارتی اور فوجی موجودگی بھی کم کر دی ہے، جب کہ اطلاعات کے مطابق اسرائیل نے ایران کے خلاف تیز تر کارروائی پر زور دیا۔

رپورٹ کے مطابق امریکی بحری بیڑے میں شامل جہازوں پر ہیلی کاپٹروں کے ذریعے گولہ بارود کی منتقلی جاری ہے، جہازوں کو زمین پر اہداف کو نشانہ بنانے والے گائیڈڈ میزائلوں سے لیس کیا جا رہا ہے، فضائی کارروائیوں کے لیے مضبوط بنکرز کو تباہ کرنے والے بموں کی بھی منتقلی کی گئی۔

ادھر 23 اکتوبر کو وزیر خارجہ مارکو روبیو کو بھیجی گئی ایک انٹیلی جنس یادداشت میں خبردار کیا گیا کہ ایران نے مشرقِ وسطیٰ اور دیگر مقامات پر امریکی اہلکاروں کو نشانہ بنانے کی کوششیں نمایاں طور پر تیز کر دی ہیں۔ دستاویز کی خبر سب سے پہلے دینے والے ادارے ایکسیوس کے مطابق، امریکی انٹیلی جنس نے اندازہ لگایا کہ امریکی شہریوں کے خلاف مہلک حملے کرنے کی ایرانی منصوبہ بندی پیش رفت کے ایک اعلیٰ مرحلے تک پہنچ چکی۔