ثانیہ مرزا نے مسجد کے لیے زمین عطیہ کرنے کی خبر پر خاموشی توڑ دی

سوشل میڈیا پر گزشتہ چند دنوں سے بھارتی ٹینس اسٹار ثانیہ اور سابق بھارتی کرکٹر محمد اظہر الدین کی ایک تصویر گردش کر رہی تھی، جس کے ساتھ یہ دعویٰ کیا گیا تھا کہ ثانیہ نے مسجد کی تعمیر کے لیے زمین وقف کی ہے۔

تاہم، ٹینس اسٹار ثانیہ مرزا کے والد عمران مرزا نے ان تمام خبروں کی سختی سے تردید کرتے ہوئے واضح کیا ہے کہ یہ تمام خبریں اور تصویر مکمل طور پر جعلی ہیں۔

سوشل میڈیا پر ایک تفصیلی بیان جاری کرتے ہوئے عمران مرزا نے کہا کہ ثانیہ کے حوالے سے گزشتہ چند دنوں سے من گھڑت اور جھوٹی خبریں پھیلائی جا رہی ہیں جن پر وہ وضاحت دینا چاہتی ہیں۔

عمران مرزا کا کہنا تھا کہ محمد اظہر الدین اور ثانیہ مرزا کی جو تصویر وائرل ہوئی ہے، وہ مصنوعی ذہانت کی مدد سے تیار کی گئی ہے جس کا حقیقت سے کوئی تعلق نہیں۔

زمین عطیہ کرنے کے حوالے سے بات کرتے ہوئے ثانیہ کے والد نے لکھا کہ اگرچہ ثانیہ یا ان کے خاندان کو اپنی خریدی ہوئی زمین پر کسی بھی طرح کے استعمال کا پورا حق حاصل ہے، لیکن وہ یہ واضح کرنا چاہتے ہیں کہ جہاں ثانیہ مرزا ٹینس اکیڈمی تعمیر کی گئی ہے، اس زمین پر کوئی مسجد نہیں بنائی جا رہی۔

عمران مرزا کا مزید کہنا تھا کہ ثانیہ اب یا مستقبل میں جو بھی سماجی یا فلاحی کام کرتی ہیں یا انہوں نے ماضی میں کیے ہیں، وہ ان کا ذاتی اور نجی معاملہ ہے اور رہے گا۔ کسی کو بھی اس کی تشہیر کا حق حاصل نہیں ہے، خاص طور پر اس وقت جب خود ثانیہ نے اس کی تصدیق نہ کی ہو۔

بعد ازاں ٹینس اسٹار ثانیہ مرزا نے بھی اپنے والد کا یہی بیان اپنی انسٹاگرام اسٹوری پر شیئر کر دیا۔