الیکشن کمیشن کا ایم کیو ایم پاکستان کو شوکاز نوٹس، انٹرا پارٹی انتخابات نہ کرانے پر وضاحت طلب

کمیشن کا کہنا ہے کہ سیاسی جماعتوں کے عہدیداران کا باقاعدگی سے انتخاب کرانا اور الیکشن ایکٹ 2017 کے تحت انٹرا پارٹی انتخابات کرانا ایک لازمی قانونی تقاضا ہے۔ اس کے علاوہ قانون کے مطابق انٹرا پارٹی انتخابات کے بعد سات روز کے اندر انتخابی سرٹیفکیٹ الیکشن کمیشن میں جمع کرانا بھی ضروری ہوتا ہے۔

الیکشن کمیشن کی جانب سے جاری کردہ اس نوٹس میں ایم کیو ایم پاکستان کو جواب دینے کے لیے 14 روز کی مہلت دی گئی ہے۔ کمیشن نے واضح کیا ہے کہ مقررہ مدت میں تسلی بخش جواب موصول نہ ہونے کی صورت میں قانون کے مطابق مزید سخت کارروائی عمل میں لائی جائے گی۔

نوٹس میں مزید انتباہ کیا گیا ہے کہ انٹرا پارٹی انتخابات نہ کرانے کے باعث ایم کیو ایم پاکستان آئندہ انتخابات کے لیے اپنا انتخابی نشان حاصل کرنے کی اہلیت سے محروم ہوسکتی ہے، اور آنے والے انتخابات کے لیے پارٹی کا انتخابی نشان روکا بھی جا سکتا ہے۔ الیکشن کمیشن نے یہ شوکاز نوٹس 26 اکتوبر کو جاری کیا تھا۔