شہری پر تشدد، پنجاب پولیس کا سب انسپکٹر گرفتار

لاہور (بیورو رپورٹ): وزیراعلیٰ پنجاب مریم نواز شریف نے کہا ہے کہ ہوٹل میں چیکنگ کے دوران شہری کو تھپڑ مارنے والے سب انسپکٹر اویس ارشد کے خلاف فوری کارروائی کرتے ہوئے مقدمہ درج کر کے گرفتار اور سروس سے معطل کر دیا گیا ہے۔

سوشل میڈیا پلیٹ فارم ’ایکس‘ (سابقہ ٹوئٹر) پر جاری اپنے بیان میں وزیراعلیٰ پنجاب مریم نواز نے واقعے کی تفصیلات شیئر کرتے ہوئے لکھا کہ سب انسپکٹر اویس ارشد ہوٹل میں تصدیقی عمل کے لیے موجود تھا جہاں اس نے شہری پر بلاجواز ہاتھ اٹھایا۔ انہوں نے واضح کیا کہ پولیس فورس میں اختیارات کے غلط استعمال کی کوئی گنجائش نہیں۔

وزیراعلیٰ کے نوٹس کے بعد پنجاب پولیس نے سب انسپکٹر اویس ارشد کے خلاف فوری طور پر فوجداری مقدمہ درج کر کے اسے گرفتار کر لیا۔ آئی جی پنجاب کو واقعے کی شفاف تفتیش کی ہدایت کی گئی ہے جبکہ ملزم ارشد کو محکمانہ تادیبی کارروائی کے لیے باقاعدہ چارج شیٹ بھی جاری کر دی گئی ہے۔

مریم نواز نے اپنے بیان کے اختتام پر دوٹوک الفاظ میں کہا کہ سرکاری اختیارات کے ناجائز استعمال کی روک تھام کے لیے سخت ترین احتساب یقینی بنایا جا رہا ہے۔ شہریوں کی عزت، وقار اور حقوق کا تحفظ حکومت کی اولین ترجیح ہے اور قانون سے بالاتر کوئی نہیں۔