امریکہ کا آبنائے ہرمز میں ایران کے بعض اہداف پر دفاعی حملے

بین الاقوامی ڈیسک (واشنگٹن / لندن): امریکہ کے ایک عہدیدار نے پیر کو بتایا ہے کہ امریکہ نے اہم وسط مدتی انتخابات سے ایک روز قبل آبنائے ہرمز میں ایران کے بعض اہداف پر دفاعی حملے کیے ہیں۔

ایرانی سرکاری ٹیلی ویژن کے مطابق جزیرۂ قشم میں دھماکوں کی آوازیں سنی گئیں۔

عہدیدار نے نام ظاہر نہ کرنے کی شرط پر بتایا کہ ان حملوں میں ان ایرانی اہداف کو نشانہ بنایا گیا جو امریکی تنصیبات کے خلاف زمین سے فضا میں مار کرنے والے میزائل استعمال کر رہے تھے۔ عہدیدار کو اس معاملے پر عوامی سطح پر بیان دینے کی اجازت نہیں تھی۔

یہ حملے مکمل جنگ دوبارہ شروع کرنے کے بجائے محدود نوعیت کے دکھائی دیتے ہیں۔ تاہم یہ حملے صدر ڈونلڈ ٹرمپ کے اس بیان کے بعد کیے گئے ہیں جس میں انہوں نے کہا تھا کہ امریکہ منگل کو ہونے والے وسط مدتی انتخابات سے پہلے ایران پر حملے نہیں کرے گا۔

وال اسٹریٹ جرنل نے ان حملوں کی خبر اس سے پہلے دی تھی۔

ایران کے ساتھ غیر مقبول جنگ اور اس کے نتیجے میں امریکہ میں پیٹرول کی قیمتوں اور معیشت کے دیگر شعبوں پر پڑنے والے اثرات ریپبلکنز کے لیے مشکلات کا باعث بنے ہوئے ہیں کیونکہ وہ کانگریس میں اپنی اکثریت برقرار رکھنے کی کوشش کر رہے ہیں۔

امریکی انتظامیہ نے آخری بار ستمبر کے اوائل میں ایران پر حملے کیے تھے تاہم ہزاروں امریکی فوجی اب بھی ایران کے قریب سمندری حدود میں موجود ہیں۔ ان کی تعیناتی کا مقصد ایرانی تیل لے جانے والے ٹینکروں کو عالمی منڈی تک پہنچنے سے روکنے کے لیے بحری ناکہ بندی برقرار رکھنا ہے۔

اس کے علاوہ ایک تیسرا امریکی طیارہ بردار بحری جہاز اور ہزاروں اضافی فوجی بھی مشرق وسطیٰ کی جانب روانہ ہو رہے ہیں۔