کوہاٹ: خوارج اور جرائم پیشہ افراد کا حملہ، پولیس کے 10جوان شہید، 18 خارجی ہلاک

پشاور (نمائندہ خصوصی): خیبر پختونخوا کے ضلع کوہاٹ میں غیر قانونی مائننگ کے خلاف آپریشن کرنے والی پولیس پارٹی پر فتنہ خوارج کے حملے میں 10 اہلکار شہید ہوگئے۔

پولیس کے جوانوں نے حملہ آوروں کا انتہائی بہادری سے مقابلہ کرتے ہوئے 18 خوارج کو ہلاک کردیا۔

خیبر پختونخوا پولیس کے مطابق کوہاٹ کے قریب درابو کچ میں غیرقانونی طور پر سونے کی مائننگ کرنے والے عناصر کے خلاف آپریشن کے بعد پولیس پارٹی واپس آرہی تھی کہ جرائم پیشہ عناصر کے ایماء پر فتنہ الخوارج نے اس پر حملہ کیا۔

تفصیلات کے مطابق جرائم پیشہ افراد کوہاٹ میں دریائے سندھ پر غیر قانونی گولڈ مائننگ کرتے تھے۔ انہیں اس غیر قانونی مائننگ کو ختم کرنے کی دو دن کی ڈیڈ لائن دی گئی تھی۔ ڈیڈ لائن ختم ہونے کے بعد باقاعدہ آپریشن کیا گیا۔

آپریشن کے دوران سونے کی غیر قانونی کان کنی کرنے والے 20 سے زائد افراد کو حراست میں لے لیا گیا یے۔ جب کہ غیر قانونی مائننگ کرنے والوں کے درجنوں ٹھکانے مسمار کر کے ان کی مشینری ضبط کرلی گئی۔

گورنر خیبر پختونخوا فیصل کریم کنڈی نے کوہاٹ میں پولیس پر فائرنگ کی مذمت کی اور پولیس ٹیم پر فائرنگ میں ملوث عناصر کو کیفرِ کردار تک پہنچانے کی ہدایت۔

مشیر اطلاعات خیبر پختون خوا ثمر ہارون بلور نے کہا شہید پولیس اہل کاروں کی قربانیاں ہمیشہ یاد رکھی جائیں گی۔

سینٹرل پولیس آفس کا کہنا ہے کہ بیرونی قوتوں کے ایما پر حملہ کیا گیا، حملہ ثبوت ہے کہ جرائم پیشہ مافیا اور فتنہ الخوارج آپس میں منظم روابط رکھتے ہیں، یہ عناصر اپنے مذموم مقاصد کے لیے جرائم پیشہ مافیاز کے ساتھ مل کر کام کر رہے ہیں، خوارج کے سہولت کاروں اور جرائم پیشہ مافیاز کو کسی صورت نہیں چھوڑا جائے گا۔

سی پی او نے کہا کہ کسی بھی غیر قانونی سرگرمی کی اجازت نہیں دی جائے گی، شہید ہونے والے پولیس کے شہداء کا تعلق خیبر پختونخواکے ضلع کوہاٹ سے تھا۔