لاہور میں اسموگ کی خطرناک صورتِ حال، ایئرکوالٹی انڈیکس 500 سے تجاوز کرگیا

لاہور (بیورو رپورٹ): لاہور : صوبائی دارالحکومت لاہور میں شہریوں کے لیے کھلی فضا میں سانس لینا بھی خطرناک ہوگیا اور ایئرکوالٹی انڈیکس 500 سے تجاوز کرگیا۔

تفصیلات کے مطابق صوبائی دارالحکومت لاہور میں فضائی آلودگی کی صورتحال انتہائی تشویشناک حد تک پہنچ گئی ہے اور شہر 509 ایئر کوالٹی انڈیکس (AQI) کے ساتھ عالمی فہرست میں پہلے نمبر پر آ گیا ہے۔

شہر کی فضا زہریلی ہونے کے باعث شہریوں کے لیے کھلی فضا میں سانس لینا بھی دشوار ہو چکا ہے۔

اس کے ساتھ بھارتی دارالحکومت نئی دہلی 221 اے کیو آئی کے ساتھ دوسرے اور قاہرہ 210 کے ساتھ تیسرے نمبر پر رہا جبکہ ڈھاکہ 167، شنگھائی 161 اور کولکتہ 158 اے کیو آئی کے ساتھ آلودہ ترین شہروں کی فہرست میں شامل ہیں۔

ماحولیاتی حکام کا کہنا ہے کہ بھارتی شہروں امرتسر اور اٹاری کی جانب سے آنے والی آلودہ ہواؤں کے باعث لاہور کا AQI شدید متاثر ہوا ہے۔ شہر کے مختلف علاقوں بالخصوص برکی روڈ، گلبرگ (457 AQI)، جی سی یونیورسٹی (392 AQI)، سمن آباد، ڈیفنس اور ماڈل ٹاؤن میں فضائی آلودگی سب سے زیادہ ریکارڈ کی گئی۔

لاہور میں صبح گیارہ بجے سے ہواؤں کی رفتار بڑھنے کے باعث اے کیو آئی میں بہتری آنے کا امکان ہے، اس وقت ہوا پانچ کلومیٹر فی گھنٹہ کی رفتار سے چل رہی ہے، جبکہ دوپہر دو بجے تک رفتار دس کلومیٹر فی گھنٹہ ہونے کی توقع ہے۔

فضائی آلودگی میں کمی کے لیے پنجاب حکومت کی جانب سے مختلف سطحوں پر اقدامات جاری ہیں ، شہر بھر میں اسموگ گنز کے ذریعے پانی کا چھڑکاؤ کیا جا رہا ہے، گزشتہ 24 گھنٹوں میں 35 صنعتی یونٹس اور 66 اینٹوں کے بھٹوں کی انسپیکشن کی گئی، جس کے دوران 6 لاکھ روپے جرمانہ عائد اور ایک بھٹہ سیل کر دیا گیا۔

ڈرون اسکواڈ، نائٹ اسکواڈ اور ہاک آئی فیلڈ اسکواڈ کے ذریعے آلودگی پھیلانے والے عناصر کی مسلسل نگرانی کی جا رہی ہے جبکہ غیر معیاری پلاسٹک کے خلاف کارروائی میں 18 کلوگرام پلاسٹک ضبط کیا گیا جبکہ 14 باربی کیو اور کمرشل ککنگ پوائنٹس پر سکشن ہڈز نصب کر دیے گئے۔

سینئر صوبائی وزیر مریم اورنگزیب نے شہریوں اور کسانوں سے اپیل کرتے ہوئے کہا ہے کہ کسان فصلوں کی باقیات کو آگ لگانے سے مکمل طور پر گریز کریں ، شہری سفر کے لیے گاڑیوں کا استعمال کم کریں اور کار پولنگ کا طریقہ اپنائیں اور گاڑیوں کے مالک بغیر فٹنس سرٹیفکیٹ کے گاڑیاں سڑکوں پر نہ لائیں۔