پاکستان میں 2 بڑے سوشل میڈیا پلیٹ فارمز رجسٹرڈ ہوگئے

اسلام آباد (قومی بیورو): اسلام آباد : پی ٹی اے نے پاکستان میں بیگو لائیو اور لائیکی کی باضابطہ رجسٹریشن کر دی، جس کا مقصد آن لائن مواد کی نگرانی کے نظام کو پہلے سے زیادہ مؤثر اور فعال بنانا ہے۔

تفصیلات کے مطابق پاکستان ٹیلی کمیونیکیشن اتھارٹی نے معروف سوشل میڈیا اور لائیو اسٹریمنگ پلیٹ فارمز "بیگو لائیو (Bigo Live) اور "لائیکی (Likee) کی ملک میں باضابطہ رجسٹریشن مکمل کر لی ہے۔

پی ٹی اے کی جانب سے جاری کردہ بیان میں کہا گیا کہ دونوں پلیٹ فارمز کی رجسٹریشن "بیگو سروس پاکستان پرائیویٹ لمیٹڈ کے تحت کی گئی ہے۔

ترجمان پی ٹی اے کا کہنا ہے کہ یہ رجسٹریشن "غیر قانونی آن لائن مواد کی روک تھام کے قواعد 2021 کے طے شدہ ضوابط اور آئینی فریم ورک کے تحت عمل میں لائی گئی ہے۔

پی ٹی اے حکام نے واضح کیا ہے کہ اس پیشرفت کا مقصد بیگو کے ساتھ مل کر آن لائن مواد کی نگرانی کے نظام کو پہلے سے زیادہ مؤثر اور فعال بنانا ہے۔

اس اقدام سے پاکستان میں سوشل میڈیا پلیٹ فارمز کے ذمہ دارانہ استعمال اور ملکی قوانین پر عمل درآمد کو یقینی بنایا جائے گا۔

بیگو لائیو اور لائیکی کی رجسٹریشن کے بعد پی ٹی اے اور ان سوشل میڈیا پلیٹ فارمز کے درمیان باہمی تعاون کا رشتہ مزید مضبوط ہوگا۔

پی ٹی اے نے اس عزم کا اعادہ کیا ہے کہ اتھارٹی ڈیجیٹل پلیٹ فارمز کے ساتھ مؤثر رابطوں، شفافیت اور مثبت تعاون کے فروغ پر مسلسل توجہ مرکوز رکھے ہوئے ہے۔