پاکستانی قطر کا 30 دن کا فری ویزا کیسے حاصل کرسکتے؟ شرائط سامنے آگئیں

دی اردو پوسٹ (مانیٹرنگ ڈیسک): اسلام آباد : قطر نے پاکستانیوں کے لیے مفت ویزہ آن ارائیول کا بڑا اعلان کرتے ہوئے شرائط بھی بتادیں۔

تفصیلات کے مطابق قطر کی وزارت داخلہ نے پاکستانی پاسپورٹ ہولڈرز کے لیے مفت "ویزہ آن ارائیول (Visa on Arrival) کی سہولت کا باقاعدہ اعلان کر دیا، جس کے تحت اہل مسافر بغیر کسی ویزہ فیس کے 30 دن تک قطر میں قیام کر سکیں گے۔

قطری حکام نے بتایا کہ یہ سہولت پاکستان کے ساتھ ساتھ بھارت اور تھائی لینڈ کے شہریوں کے لیے بھی دستیاب ہوگی، تاہم قیام کی مدت کا انحصار مسافر کی کنفرم شدہ ہوٹل بکنگ پر ہوگا۔

قطر کی وزارت داخلہ کی ہدایت کے مطابق مفت ویزہ آن ارائیول حاصل کرنے کے لیے درج ذیل شرائط پر پورا اترنا لازمی ہوگا۔

پاسپورٹ قطر پہنچنے کی تاریخ سے کم از کم 3 ماہ کے لیے کارآمد ہونا چاہیے۔

آمدورفت کی کنفرم شدہ (Round-trip) ہوائی ٹکٹ موجود ہو۔

ہوٹل کی بکنگ صرف اور صرف قطر کی آفیشل ویب سائٹ "Discover Qatar کے ذریعے کی گئی ہو۔ کسی بھی دوسری عام ویب سائٹ سے کی گئی بکنگ قابلِ قبول نہیں ہوگی۔

قطر کی منظور شدہ انشورنس کمپنی سے جاری شدہ کارآمد ہیلتھ انشورنس ہونا ضروری ہے۔

مفت ویزہ آن ارائیول سہولت کے تحت پاکستان سے آنے والے مسافر زیادہ سے زیادہ 30 دن تک قیام کر سکتے ہیں۔

تاہم مسافر کو اتنے ہی دنوں کی اجازت ملے گی جتنے دنوں کی اس نے ہوٹل بکنگ کروائی ہوگی۔ اگر کسی کی بکنگ 30 دن سے کم ہے تو قیام کی اجازت بھی اسی کے مطابق ملے گی۔

واضح رہے کہ اس سے قبل ایسی خبریں سامنے آئی تھیں کہ قطر نے پاکستانیوں کے لیے آن ارائیول اور آن لائن ویزا سہولیات عارضی طور پر معطل کر دی ہیں، تاہم اب قطری حکام کی جانب سے ان 4 لازمی شرائط کے ساتھ مفت ویزہ آن ارائیول کی باقاعدہ وضاحت جاری کر دی گئی ہے۔