کراچی: انٹر بورڈ کی جعلی ویب سائٹ کے ذریعے طلبا کو فی پیپر 10 ہزار روپے میں کلیئر کرانے کی پیشکش

دعویٰ کیا جا رہا ہے کہ لاکھوں روپے بٹورنے کے بعد جعلی ویب سائٹ کو مینٹی نینس کے نام پر بند کر دیا گیا۔

چیئرمین انٹربورڈ کراچی فقیر محمد لاکھو نے وضاحت جاری کرتے ہوئے کہا کہ اعلیٰ ثانوی تعلیمی بورڈ کا اس جعلی ویب سائٹ سے کوئی تعلق نہیں۔

انہوں نے واضح کیا کہ بورڈ کی آفیشل ویب سائٹ کی شناخت بلیو مارک سے کی جا سکتی ہے اور طلبہ معلومات یا رابطے کے لیے صرف سرکاری ویب سائٹ استعمال کریں۔

چیئرمین انٹربورڈ کا کہنا تھا کہ جعلی ویب سائٹ کے حوالے سے نیشنل سائبر کرائم انویسٹی گیشن ایجنسی (این سی سی آئی اے) کو متعدد بار آگاہ کیا جا چکا ہے، جبکہ اس کی روک تھام کے لیے متعلقہ ادارے کو خط بھی ارسال کیا گیا۔

انٹربورڈ حکام نے والدین اور طلبہ کو خبردار کیا ہے کہ وہ نتائج کلیئر کرانے یا تبدیل کرنے کے نام پر کسی کو رقم ادا نہ کریں اور غیر مصدقہ ویب سائٹس یا واٹس ایپ نمبرز پر اعتماد کرنے سے گریز کریں۔