کراچی: بھائی نے فائرنگ کر کے دو بہنوں کو قتل کر دیا

کراچی (معاشی و سیاسی بیورو): کراچی(29 اکتوبر 2026): شاہ فیصل کالونی میں ڈرگ روڈ کینٹ بازار کے قریب ایک گھر میں گھریلو ناچاقی کے دوران خون کی ہولی کھیلی گئی، جہاں سفاک بھائی نے فائرنگ کر کے اپنی دو جوان بہنوں کو موت کے گھاٹ اتار دیا۔

پولیس کے مطابق ملزم نے گھر کے اندر تلخ کلامی اور جھگڑے کے دوران فائرنگ کی جس کے نتیجے میں 25 سالہ صوبیہ اور 20 سالہ ہیرا موقع پر ہی جاں بحق ہو گئیں۔ واقعہ کے بعد ملزم موقع سے فرار ہونے میں کامیاب ہو گیا۔

پولیس اور ریسکیو اہلکاروں نے دونوں مقتولہ بہنوں کی لاشیں ضابطے کی کارروائی کے لیے جناح اسپتال منتقل کر دیں۔

پولیس حکام کا کہنا ہے کہ پانچ روز قبل ہی لڑکیوں کے والد کا انتقال ہوا تھا، جس کے بعد سے بھائی کے بہنوں کے ساتھ اکثر جھگڑے رہتے تھے۔ پولیس نے جائے وقوعہ سے نائن ایم ایم پستول کے 9 خول برآمد کر لیے ہیں۔

جبکہ ابتدائی تفتیش سے معلوم ہوا ہے کہ سفاک ملزم ایک عادی جرائم پیشہ شخص ہے۔ پولیس نے ملزم کی گرفتاری کے لیے چھاپے مارنا شروع کر دیے ہیں اور مزید تحقیقات جاری ہیں۔