کراچی میں ایچ ون این ون وائرس پھیلنے لگا، مریضوں کی تعداد میں تیزی سے اضافہ

کراچی (معاشی و سیاسی بیورو): کراچی : شہر قائد میں ایچ ون این ون وائرس پھیلنے لگا جبکہ فلو کے مریضوں میں تقریباً دوگنا اضافہ ہوگیا۔

کراچی میں موسم کی تبدیلی اور رات کے وقت درجہ حرارت میں کمی کے ساتھ فلو جیسی علامات کے مریضوں کی تعداد میں تیزی سے اضافہ ہونے لگا۔

شہر کے بڑے سرکاری اسپتالوں میں مریضوں کی تعداد تقریباً دوگنا ہوگئی، جبکہ ڈاکٹرز نے شہریوں کو احتیاطی تدابیر اختیار کرنے کی ہدایت کی ہے۔دی۔

جناح پوسٹ گریجویٹ میڈیکل سینٹر (جے پی ایم سی) کے شعبہ ایمرجنسی کے سربراہ ڈاکٹر عرفان صدیقی نے بتایا کہ اسپتال میں فلو جیسی علامات کے حامل 70 سے 80 مریض روزانہ آرہے ہیں، جبکہ پہلے یہ تعداد 30 سے 40 تھی۔

اسی طرح ڈاکٹر رتھ فاؤ سول اسپتال کراچی میں بھی فلو کے مریضوں کی یومیہ تعداد 15 سے 20 سے بڑھ کر 30 سے 40 تک پہنچ گئی۔

طبی ماہرین کا کہنا ہے کہ بچوں، بزرگوں اور کمزور قوت مدافعت رکھنے والے افراد کو سانس کی بیماریوں سے پیچیدگیوں کا زیادہ خطرہ۔

ڈاکٹرز نے شہریوں کو رش والی جگہوں پر ماسک پہننے، ہاتھ بار بار دھونے، بیمار افراد سے قریبی رابطے سے گریز اور مناسب آرام کرنے کا مشورہ دیا۔

ماہرین نے فلو کی سالانہ ویکسین لگوانے کے لیے بھی ڈاکٹر سے مشورہ کرنے کی ہدایت کی ہے، جبکہ فلو کی علامات ظاہر ہونے پر دوسروں تک انفیکشن پھیلنے سے روکنے کے لیے میل جول محدود رکھنے کا کہا۔

دوسری جانب رواں سال انفلوئنزا کے تقریباً 400 کیسز رپورٹ ہوئے ہیں، متعدی امراض کے ماہر پروفیسر ڈاکٹر فیصل محمود کے مطابق کراچی میں انفلوئنزا اے کی قسم H1N1 بھی گردش کر رہی۔

H1N1 انفلوئنزا کی ایک قسم ہے جو بعض مریضوں میں نمونیا سمیت سنگین پیچیدگیوں کا سبب بن سکتی ہے تاہم کھانسی، نزلہ یا بخار کی ہر شکایت انفلوئنزا نہیں ہوتی، اس کی تصدیق کے لیے لیبارٹری ٹیسٹ ضروری ہوسکتا۔

ڈاکٹرز نے خدشہ ظاہر کیا ہے کہ سال کے اختتام تک فلو کے کیسز مزید بڑھ سکتے ہیں، اس لیے شہری بالخصوص زیادہ خطرے سے دوچار افراد بروقت طبی مشورہ حاصل کریں۔