گل پلازہ کے شہید فائر فائٹرکے لیے تمغۂ شجاعت کا اعلان

کراچی (معاشی و سیاسی بیورو): کراچی : گل پلازہ آتشزدگی کے دوران اپنی جان کا نذرانہ دے کر دوسروں کی جان بچانے والے کراچی کے فائر فائٹر ہیرو شہید فرقان کو قومی اعزاز سے نوازا جائے گا۔

دی اردو پوسٹ کی رپورٹ کے مطابق میئر کراچی بیرسٹر مرتضیٰ وہاب کی جانب سے شہید فرقان کی خدمات کے اعتراف میں قومی اعزاز دینے کی کوششیں کامیاب ہوگئیں۔

سانحہ گل پلازہ کے دوران اپنی جان خطرے میں ڈال کر دوسروں کی زندگیاں بچانے والے کراچی میٹرو پولیٹن کارپوریشن (کے ایم سی) کے فائر فائٹر شہید فرقان علی کو ان کی بہادری اور فرض شناسی کے اعتراف میں تمغۂ شجاعت سے نوازا جائے گا۔

صدرِ مملکت آصف علی زرداری نے شہید فائر فائٹر فرقان علی کے لیے قومی اعزاز کی منظوری دے دی ہے۔

شہید فرقان علی کو یہ اعزاز گل پلازہ میں لگنے والی ہولناک آگ کے دوران امدادی کارروائیوں میں غیر معمولی جرأت اور فرض سے وابستگی کا مظاہرہ کرتے ہوئے جان قربان کرنے پر دیا جا رہا ہے۔

پلازہ میں بڑی تعداد میں دکانیں موجود تھیں، جہاں کپڑے، کاسمیٹکس، پلاسٹک اور دیگر آتش گیر سامان کی موجودگی کے باعث آگ نے شدت اختیار کرلی۔

آگ بجھانے اور عمارت میں پھنسے افراد کو بچانے کے آپریشن میں فائر فائٹر فرقان علی بھی شامل تھے۔ وہ گل پلازہ کی عقبی دکانوں میں آگ بجھانے اور امدادی کارروائیوں میں مصروف تھے کہ 18 جنوری کی صبح تقریباً پانچ بجے عمارت کا ملبہ ان پر آ گرا۔ اس حادثے میں وہ جانبر نہ ہوسکے اور فرض کی ادائیگی کے دوران شہید ہوگئے۔

گل پلازہ سانحے میں شہید فائر فائٹر فرقان علی کو سول ایوارڈ دینے کے لیے سفارش کی جائے گی۔